Petropavlda jyl basynan beri joǵalǵan 83 bala aman-esen tabyldy
PETROPAVL. QazAqparat – Petropavl turǵyndary iz-túzsiz joǵalǵan balalaryn izdep tabýǵa kómektesýdi surap, bıyl polıtsııaǵa 83 ret júgingen. Barlyq jaǵdaıda da joǵalǵandar bir táýlik ishinde aman-esen tabylyp, ata-analaryna tabystaldy, dep habarlaıdy QazAqparat tilshisi.
Soltústik Qazaqstan oblysy polıtsııa departamenti baspasóz qyzmetiniń málimetinshe, 1 qazanǵa qaraǵan túni Petropavl turǵynynan 12 jastaǵy qyzynyń joǵalǵany týraly ótinish túsken. Jasóspirimdi tabý úshin oblystyq PD jáne Petropavl qalalyq PB jeke quramy izdestirý jumysyna tartyldy. Qyz telefonyn sóndirip, qońyraýǵa jaýap bermegen.
Іzdestirý kelesi kúnniń tús mezgiline deıin jalǵasty. Polıtseıler habarsyz ketken jasóspirimniń qurbysynyń úıine qonyp, tańerteń ketip qalǵanyn anyqtady. Kóp uzamaı jedel ýákilder qyzdy bir dosynyń úıinen tapty. Jurtty ábigerge salǵan qyzben jáne onyń anasymen tártip saqshylary profılaktıkalyq áńgime júrgizdi.
«Ata-analardy kámeletke tolmaǵan balalarynyń psıhologııalyq jaǵdaıyna nazar aýdarýǵa, ózara jaıly qarym-qatynas ornatýǵa shaqyramyz. Táýelkel tobyndaǵy balalardy aldyn ala anyqtaý úshin ustazdarmen, psıhologııalyq-pedagogıkalyq qyzmetkerlermen ózara is-qımyl jasaı otyra, osyndaı faktilerdiń aldyn alýdy kúsheıtý josparlanyp otyr. 2022 jyl Qazaqstanda Balalar jyly dep jarııalandy – osy oraıda elimizdiń kishkentaı turǵyndarynyń qaýipsizdigin qamtamasyz etý úshin qoǵam bolyp kúsh biriktirý asa mańyzdy», - deıdi Petropavl qalalyq polıtsııa basqarmasy jergilikti polıtsııa qyzmeti bólimi bastyǵynyń orynbasary Aıdyn Aqmaǵambetov.
Jyl basynan beri oblys ortalyǵynyń turǵyndary polıtsııaǵa iz-túzsiz joǵalǵan balalaryn izdep tabýǵa kómektesýdi surap, 83 ret júgingen. Balalardyń barlyǵy bir kúnniń ishinde tabyldy.
