Petropavlda jyl basynan beri 34 maskúnem májbúrli túrde emdeýge jiberilgen
PETROPAVL. QazAqparat – Petropavlda týǵan-týystary men kórshilerine maza bermegen maskúnem on adam májbúrli túrde emdelýge narkologııa mekemesine jatqyzyldy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, tártip saqshylary maskúnemderdi sottyń sheshimimen májbúrlep emdeý úshin narkologııa mekemesine jatqyzdy. Bul – jyl basynan beri emdelýge ákelingenderdiń ekinshi legi.
Spırttik ishimdik ishýdi jaqsy kóretinder polıtsııanyń esebinde tur. Al olar mas kúıde birneshe ret zań buzsa, bul májbúrli emdeýge jiberýge negiz bola alady. Basqa jaǵdaıda týystarynyń ótinishi kerek, biraq jaqyndary kóbinese olardyń alkogoldi tastaımyn dep bergen ýádesine senip, ótinishin qaıtaryp alady.
Mamandardyń aıtýynsha, alkogolızmmen aýyratyndar sendirgish bolyp keledi, psıhologııalyq qysym jasaýǵa sheber. Osylaısha, qala turǵyndarynyń biri aǵasyn emdeýge jiberý úshin eń aldymen qarsylasqan qaryndastaryn kóndirýge týra kelgen. Sebebi maskúnem aǵasy olar aryz jazsa ózine qol jumsaıtynyn aıtyp qorqytyp otyrǵan. Tek er adam men ýchaskelik ınspektordyń birlesken is-áreketiniń arqasynda ǵana naýqasty emdelýge jiberýge múmkin boldy.
«Otbasyńda maskúnem bolsa berekeń ketedi. Bir kezderi aǵamnyń jaqsy jumysy boldy, elevatorda eńbek etti. Biraq qazir bárinen aıyrylǵan. Osyndaı jaǵdaıǵa tap bolǵandardyń bárine tabandylyq tanytýǵa keńes beremin. Bul shyrǵalańnan shyǵýdyń jalǵyz joly – emdetý», - deıdi qala turǵyny.
Májbúrlep emdeýge jiberý úshin adamdy naýqas dep taný qajet. Táýeldilikten arylýǵa nıeti bolmaǵan adam medıtsınalyq komıssııadan óte almaıdy. Sondyqtan ýchaskelik ınspektorǵa ony analız tapsyrtý úshin kabınetten kabınetke alyp júrýine týra keledi. Tek barlyq materıaldar jınalǵan soń ǵana sot jarty jyldan eki jylǵa deıingi merzimge májbúrlep emdeý úshin narkologııa mekemesine joldaý týraly sheshim qabyldaıdy.
«Sheshim zańdy kúshine enýi úshin bir aı kerek. Osy ýaqytta ýchaskelik ınspektorlardan da maza ketedi. Óıtkeni naýqastar ishkilikke odan beter salynyp, qumarlyqqa erik beredi. Májbúrlep emdeý onyń tolyq emdelip shyǵýyna kepildik bermeıdi, degenmen remıssııa kezeńinde adam qalypty ómirge oralýy múmkin. Narkologııaǵa osy joly májbúrli túrde emdelýge jatqyzylǵan 10 adamnyń úsheýi buǵan deıin de jatyp shyqqan», - deıdi Petropavl qalalyq polıtsııa basqarmasy JPQ bólimi bastyǵynyń orynbasary Aıdyn Aqmaǵambetov.
Jyl basynan beri Petropavl polıtseıleri 34 adamdy májbúrli emdelýge jiberdi.
