Petropavlda jyl basynan 49 maskúnem májbúrli emdelýge jiberildi

PETROPAVL. QazAqparat – Petropavlda polıtseıler bıyl 49 adamdy maskúnemdikten emdelýge májbúrli túrde jiberdi, dep habarlaıdy QazAqparat tilshisi.

Soltústik Qazaqstan oblysy Polıtsııa departamenti baspasóz qyzmetiniń málimetinshe, Petropavldyń 57 jastaǵy turǵyny spırttik ishimdikke toıyp alyp, otbasynyń shyrqyn buzǵan. Janjalqoıdan sharshaǵan áıeli men qyzy polıtsııadan kómek surap, aryzdandy. Bul ýchaskelik ınspektorlarǵa maskúnemdi májbúrli túrde emdeýge jiberýge negiz boldy.

Zordyń kúshimen medıtsınalyq komıssııadan ótken er adam ortalyqqa jatpaý úshin Petropavldan ketip qalǵan. Osylaısha oblys aýdandarynyń birinde uzaq ýaqyt boıy jasyrynyp jatqan. Úıine oralǵan oǵan qaıta komıssııadan ótýge týra keldi. Medkomıssııadan jaltarǵanymen ýchaskelik polıtsııa ınspektory ony dárigerlerdiń qaraýyna otbasyda janjal shyǵarǵany úshin ákimshilik qamaqty ótegen kezderi aparyp júrgen. Nátıjesinde ol sot sheshimi boıynsha májbúrlep emdeýdiń narkologııalyq ortalyǵyna jiberildi.

«Maskúnemderdi qoǵamǵa basqasha qaıtara almaısyz, tek emdeý kerek. Shańyraǵynda týǵandarynyń mazasyn alsa, zorlyq-zombylyq jasasa – bul májbúrlep emdelýge jiberýge negiz bola alady. Biraq jaǵdaıdy buǵan jetkizbegen jón. Mas janjalqoılardyń áreketi erteli-kesh turmystyq zorlyq-zombylyq faktilerine alyp keledi, sońy aýyr qylmyspen aıaqtalýy múmkin. Aşy sýǵa táýeldi jandardyń jaqyndary buǵan tosqaýyl bola alady. Maskúnemderdiń túzelemin degen ýádesi bos sóz ekenin túsingen jón. Bundaı adamdarǵa mamandardyń kómegi qajet», - deıdi Petropavl qalasy PB Jergilikti polıtsııa qyzmeti bóliminiń bastyǵy Rýstam Sadýlov.

Jyl basynan Petropavl polıtseıleri 49 adamdy maskúnemdikten emdelýge májbúrlep jibergen.