Petropavlda jyl basynan 30 plastıkalyq ota jasaldy
PETROPAVL. QazAqparat - Bettiń terisin tartý, muryn men qulaqty kishireıtý nemese erin men kókirekti úlkeıtý sekildi plastıkalyq otany endi Petropavl qalasynda da jasatýǵa bolady. Oblystyq onkologııalyq dıspanserde jyl basynan beri osyndaı 30 ota jasaldy, dep habarlaıdy QazAqparat.
Dárigerlerlerdiń aıtýynsha, elimizdegi plastıkalyq otanyń quny kórshi Reseımen salystarǵanda anaǵurlym arzan. Aqyly emhanalardaǵy hırýrgter de óz jumysyna qymbat alady. Al, memlekettik mekemelerde mundaı ota túrin arzan baǵaǵa jasaýǵa bolady. Sebebi, baǵany Densaýlyq saqtaý mınıstrligi bekitedi.
Rashıd Álıev oblystyq onkologııalyq dıspanserdiń torakaldy hırýrgi. Medıtsına salasynda eńbek etip júrgenine 11 jyl. Bilikti maman onkologııalyq aýrýǵa shaldyqqan syrqattarǵa ota jasaıdy. Solardyń ishinde eń keń taraǵany - áıelderdiń sút beziniń obyry. Syrqat aýrýdy asqyndyryp alsa keýdesin alyp tastaýǵa týra keletini barshaǵa málim. Alaıda, qazirgi ozyq tehnologııalardyń arqasynda kókirekti qalpyna keltirýge bolady. Rekonstrýktıvti ota jasaıtyn Rashıd Álıev endi plastıkalyq ota jasaýdy da qolǵa alǵan.
«Plastıkalyq otany jasatam deýshilerdiń qatarynda jasy egde tarqan áıelder de bar. Árıne jasy ulǵaıǵan saıyn áıel adam óziniń sulýlyǵyn saqtap qalǵysy keledi. Bizdiń bólimshemiz torakaldy hırýrgııa bolǵandyqtan, árıne mammologııamen de aınalysamyz. Jas qyz-kelinshekter ádemi keýde bolǵanyn qalaıdy. Jaryq dúnıege sábı ákelip, balany emizgesin, áıeldiń keýdesi óziniń ádemi pishimin joǵaltady. Ne bolmasa sút beziniń obyryna shaldyqqandar keledi. Eger de syrqattyń keýdesin alyp tastaý qajet bolsa, ondaı jaǵdaıda biz jańasyn jasap bere alamyz. Al, plastıkalyq otamen ólshemi ózgertilgen keýdemen bala emizý densaýlyqqa eshqandaı zııan keltirmeıdi», - deıdi oblystyq onkologııalyq dıspanserdiń torakaldy hırýrgi Rashıd Álıev.
Sońǵy jyldary blefaroplastıka, ıaǵnı kózdiń joǵary qabaǵynyń pishinin ózgertýge suranys artqan. Muny «eýropalyq qabaq» sındromy dep te ataıdy. Batystan kelgen taǵy bir kosmetologııalyq protsedýra - erin úlkeıtý. Bul - hırýrgııalyq otaǵa jatpaıdy, baǵasy da qoljetimdi. Kóptegen plastıkalyq otanyń jaramdylyq ýaqyty bolady. Qabaqty ashýdyń - 10-15 jylǵa, bettiń ájimderin azaıtyp, terini tartýdyń 20-25 jylǵa deıin nátıjesi saqtalady, deıdi dárigerler.
«Ár otanyń quny ártúrli. Mysaly, bleforoplastıka bizde Qazaqstan boıynsha eń arzan bolyp esepteledi. Ol 130, 150 myń teńge shamasynda turady. Keı kezderi qyz-kelinshekter eki túrli otany birden jasatady. Bul óte yńǵaıly» - deıdi oblystyq onkologııalyq dıspanserdiń torakaldy hırýrgi Rashıd Álıev.
Avtor: Aqerke Dáýrenbekqyzy
