Petropavlda jyl bastalǵaly 68 qańǵybas panajaıǵa ornalastyryldy
PETROPAVL. QazAqparat – Petropavlda qańtar aıynan beri 68 qańǵybas qabyldap-taratý ornyna jetkizilip, qatty aıazdarda olardyń úsip ketýine jol berilmedi, dep habarlaıdy QazAqparat tilshisi.
Soltústik Qazaqstan oblysy polıtsııa departamenti baspasóz qyzmetiniń málimetinshe, aıazdyń kúsheıýine baılanysty polıtseıler turǵylyqty jeri joq adamdardy anyqtaýǵa baǵyttalǵan reıdterdi kúsheıtken. Úısizder qabyldap-taratý ornyna jetkizilip, barlyq bazalar boıynsha tekseriledi, al keshke túneý ornyna jóneltiledi.
Polıtseılerdiń aıtýynsha, qańǵybastar negizinen vokzal mańy men qala ortalyǵyn jaǵalaıdy. Káriz qudyqtary men jylý trassalarynda top-toppen bas saýǵalap, sarshunaq aıazdan qorǵanady. Polıtsııanyń reıdtik toby olardy anyqtap, úsip ketýden qorǵap qana qoımaı, qylmys pen quqyq buzýshylyqtardyń aldyn alady.
«Reıdtik top kún saıyn saǵat 16.00-den tún jarymǵa deıin jumys isteıdi. Maqsaty – turǵylyqty jeri joq adamdarǵa áleýmettik, medıtsınalyq jáne basqa da kómek kórsetý, sondaı-aq halyqtyń sanıtarlyq-epıdemıologııalyq saýlyǵyn qamtamasyz etý jáne qoǵamdyq tártipti nyǵaıtý», - deıdi Petropavl qalalyq polıtsııa basqarmasy qabyldap-taratý ornynyń bastyǵy Adaı Smaıyl.
Jyl basynan qabyldap-taratý ornyna turǵylyqty jeri joq 68 adam jetkizildi, olardyń 4-ýi sýdıanyń sanktsııasy boıynsha ornalastyryldy. Byltyr polıtseıler úısizderdi qabyldap-taratý ornyna 2656 ret qańǵybas jetkizgen. Olardyń 8-i buryn izdeýde bolǵan, 2-i iz-tússiz joǵalǵan adam.
Polıtseıler úısizderge qatysty barlyq shaqyrtýlarǵa barady jáne olardy bólimshege jetkizedi. Turǵylyqty jeri joq tulǵalar týraly qabyldap-taratý ornyna 52-92-99 telefony boıynsha nemese «102» arnasy arqyly habarlaýǵa bolady.
