Petropavlda júzý jattyqtyrýshysy esirtki aınalymyna qatysy bar degen kúdikke ilikti
PETROPAVL. KAZINFORM — Petropavldaǵy júzý jattyqtyrýshysyn polıtseıler quramynda esirtkisi bar 56 tabletkamen ustady.
Soltústik Qazaqstan oblysy Polıtsııa departamenti baspasóz qyzmetiniń málimetinshe, 1990 jyly týǵan er adam Petropavl aýmaǵynda kúshti áser etetin preparattardyń zańsyz aınalymyna qatysy bar degen kúdikke ilindi. Odan retseptisiz satyp alynǵan «Pregabalın» preparatynyń 4 blısteri tárkilendi. Medıtsınalyq kýálandyrý kúdiktiniń kannabınoıdtardy qoldanǵanyn kórsetti.
Polıtseıler dáriler satyp alynǵan dárihanany anyqtady. Petropavldyń 40 jastaǵy turǵyny — farmatsevtke qatysty kúshti áser etetin zattardyń zańsyz aınalymy faktisi boıynsha qylmystyq is qozǵaldy. Tergeý kezeńinde dárihanadan tek retseptimen ǵana beriletin barlyq preparat tárkilendi.
Polıtseıler mundaı zattardyń baqylaýsyz taratylýy esirtkige táýeldilikke ákelip nemese artyq dozalanǵan jaǵdaıda jazataıym oqıǵalarǵa uryný qaýpin arttyratynyn atap ótti.
Jyl basynan beri polıtseıler SQO-da kúshti áser etetin zattar men prekýrsorlardyń zańsyz aınalymynyń 5 faktisin, sondaı-aq mundaı zattardy aınalymǵa shyǵarý qaǵıdalaryn buzýdyń 3 deregin anyqtady.
Buǵan deıin Shymkentte belgili asaba esirtkige uqsas zattarmen ustalǵanyn jazǵan edik.
