Petropavlda júrgizýshi saqtandyrý kompanııasyn sotqa berip, 2 mln teńge óndirip aldy
PETROPAVL. KAZINFORM — Saqtandyrý kompanııasy jol-kólik apatyna túsken Petropavl turǵynyna keltirilgen shyǵyn mólsherinen 3 ese az tólem jasamaq bolǵan.
Soltústik Qazaqstan oblystyq soty baspasóz qyzmetiniń málimetinshe, azamattyq isti Petropavl qalasynyń № 2 soty qarady.
Іs materıaldaryna sáıkes, jol-kólik oqıǵasyna kináli júrgizýshi ákimshilik jaýapkershilikke tartylǵan. Al onyń saqtandyrý kompanııasy zaqymdanǵan avtokólikti qalpyna keltirý qunyn 674 myń teńge dep eseptegen. Alaıda kólik ıesi bul somamen kelispeı, táýelsiz baǵalaýshynyń qyzmetine júgingen. Saraptama amortızatsııalyq tozýdy eskere otyryp keltirilgen shyǵyn 2 mln 325 myń teńge dep qorytyndy shyǵardy.
Kólik ıesi saqtandyrý ombýdsmenine júginip, saqtandyrý tóleminiń mólsherin qaıta qaraýdy suraǵan. Ombýdsmenniń sheshimimen tólem 873 myń teńge bolyp belgilengen. Petropavl turǵyny bul somamen de kelispeı, sotqa talap aryz berdi.
Sot talqylaýy barysynda avtokólikke qatysty sot saraptamasy taǵaıyndaldy. Sarapshy amortızatsııalyq tozýdy eskere otyryp, avtokólikti qalpyna keltirýge qajetti jóndeý jumystarynyń, qosalqy bólshekter men materıaldardyń jalpy quny 1 mln 829 myń teńge dep eseptedi.
Sot saraptama qorytyndysyn negizgi ári senimdi dep tanyp, zertteýdi bilikti maman zań talaptaryna sáıkes júrgizgenin atap ótti. Sonymen qatar saraptama saqtandyrý kompanııasy anyqtaǵan jóndeý qunynyń negizsiz tómendetilgenin rastady.
Nátıjesinde sot kólik ıesiniń paıdasyna 1 mln 829 myń teńge mólsherinde saqtandyrý tólemin óndirip berý týraly sheshim shyǵardy.
Budan bólek, saqtandyrý kompanııasynan sot shyǵyndary da óndirildi. Osylaısha talapkerge jalpy somasy 2 mln 039 myń teńge tólendi.
SQO sotynyń azamattyq ister jónindegi appelıatsııalyq sot alqasy birinshi satydaǵy sottyń sheshimin ózgerissiz qaldyrdy. Sot sheshimi zańdy kúshine endi.
Buǵan deıin Petropavlda mektepke jarylǵysh zat qoıyldy dep «ázildegen» jasóspirim sottalǵanyn jazǵan edik.
