Petropavlda júrgizýshi kýáligi joq mas adam júk kóligin aıdap áketpek boldy
PETROPAVL. QazAqparat – Petropavlda spırttik ishimdik ishken er adam júk kóligin aıdap áketpek bolǵan jerinen ustaldy, dep habarlaıdy QazAqparat tilshisi.
Soltústik Qazaqstan oblysy polıtsııa departamenti baspasóz qyzmetiniń málimetinshe, Petropavldaǵy tehnıkalyq qyzmet kórsetý ortalyǵynda «DAF» júk kóliginiń júrgizýshisi tirkemesiniń dońǵalaǵyn jóndep jatqanda kenetten kólik ornynan qozǵalǵan.
Mashınanyń kabınasynda beıtanystyń otyrǵanyn kórgen kásiporyn júrgizýshisi men kúzetshisi ony toqtatpaq bolady.
Júk kóligi jaqyn turǵan «Mazda» avtomashınasyna soǵylyp baryp toqtaıdy.
Oqıǵa ornyna shaqyrylǵan polıtseıler kúdiktini ustady.
Petropavldyń 42 jastaǵy turǵyny buryn múliktik qylmystar jasaǵany úshin sottalǵan. Er adam mas bolǵan.
Onyń aıtýynsha, júk kóliginiń kabınasyna jylyný úshin kirgen. Odan arǵy áreketterin túsindire almady.
Bul derek QR Qylmystyq kodeksiniń «Avtomobıldi nemese ózge de kólik quralyn jymqyrý maqsatynsyz quqyqqa syıymsyz ıelenip alý» baby boıynsha tirkeldi.
Budan basqa kúdikti kólik róline júrgizý quqyǵynsyz otyrǵany jáne mas kúıde kólikti basqarǵany úshin ákimshilik jaýapkershilikke tartylǵan.
Oǵan mindetti túrde kelý týraly bultartpaý sharasy taǵaıyndaldy.
SQO PD krımınaldyq polıtsııa basqarmasynyń bastyǵy Petr Klımovtyń aıtýynsha, bul - bıyl oblysta kólik quralyn zańsyz ıemdenýdiń ekinshi deregi.
Byltyr osyndaı 85 fakti tirkelgen.
