Petropavlda júrgizýshi kýáligi joq er adam kólikpen aǵashqa soǵyldy

PETROPAVL. QazAqparat – Petropavlda júrgizýshi kýáligin almaǵan 34 jastaǵy turǵyn kólik júrgizemin dep aǵashqa soǵyldy, dep habarlaıdy QazAqparat tilshisi.

Soltústik Qazaqstan oblysy Polıtsııa departamenti baspasóz qyzmetiniń málimetinshe, oqıǵa 4 mamyrdan 5 mamyrǵa qaraǵan túni Petropavldaǵy Jambyl jáne Chaıkovskıı kósheleriniń qıylysynda bolǵan. 34 jastaǵy oblys ortalyǵynyń turǵyny «Reno» kóligimen aǵashty soǵyp, qulatqan. Kólik júrgizýshisi emdeý mekemesine jetkizilip, alǵashqy medıtsınalyq kómek kórsetilgennen keıin úıine jiberildi.

Polıtseıler tekserý barysynda er adamnyń júrgizýshi kýáligin almaǵanyn anyqtady. Sondaı-aq ol ishimdikke qatysty medıtsınalyq kýálandyrýden ótýge bas tartty. Alaıda budan ol utylmasa – utqan joq. Óıtkeni medıtsınalyq kýálandyrýden bas tartý quqyq buzýshylyq bolyp esepteledi.

«Medıtsınalyq kýalandyrýdan bas tartqany jáne kólikti júrgizýshi kýáliginsiz basqaryp, jol-kólik oqıǵasyna jol bergeni úshn er adamǵa eki hattama toltyryldy. Materıaldar Petropavldyń mamandandyrylǵan ákimshilik sotyna joldanady. Qazir ol ákimshilik qamaýǵa alyndy», - deıdi Petropavl qalalyq polıtsııa basqarmasy patrýldi polıtsııa batalony shtabynyń aǵa ınspektory Oksana Popova.