Petropavlda júrgizýshi 9 jasar balany qaǵyp, oqıǵa ornynan izin sýytqan
PETROPAVL. QazAqparat – Petropavlda polıtseıler 9 jasar balany kóligimen qaǵyp, oqıǵa ornynan qashyp ketken er adamdy izdestirip jatyr, dep habarlaıdy QazAqparat tilshisi.
Soltústik Qazaqstan oblysy polıtsııa departamenti baspasóz qyzmetiniń málimetinshe, 29 maýsym kúni keshke polıtsııaǵa Petropavlda jol-kólik oqıǵasy bolǵandyǵy jóninde habarlama túsedi.
Oqys oqıǵa Jumysshy kentinde bolǵan. Pýgachev kóshesinde velosıped teýip júrgen 9 jasar balany «Audi-100» kóliginiń júrgizýshisi qaǵyp, ózi oqıǵa ornynan qashyp ketken.
Er bala aýrýhanaǵa jetkizilip, medıtsınalyq kómek kórsetilgennen keıin úıine jiberildi.
Tártip saqshylary kólik júrgizýshisin anyqtady. Onyń turǵylyqty mekenjaıyna kelip, kólikti aýladan tapty, ıesi úıde joq bolyp shyqty.
Qazir ol izdestirilip jatyr. Ákimshilik materıal jınalyp, júrgizýshige qatysty jol-kólik oqıǵasynda óz mindetin oryndamaǵany úshin hattama toltyryldy.
Jalpy jyl basynan SQO polıtseıleri oqıǵa ornynan qashyp ketken 16 júrgizýshini izdep tapty.
