Petropavlda júrginshiler jolaǵymen ótip bara jatqan 21 jastaǵy jigitti kólik qaǵyp, mert qyldy
PETROPAVL. QazAqparat – Petropavlda júrginshiler jolaǵymen ótip bara jatqan 21 jastaǵy jigitti kólik qaǵyp ketti. Zardap shegýshi aýrýhanada qaıtys boldy, dep habarlaıdy QazAqparat tilshisi.
Jol apatynyń beınejazbasy áleýmettik jelide tarady. Qatty soqqydan jigit birneshe metrge ushyp ketken. Jedel járdem qyzmeti oqıǵa ornyna tez jetkenimen, zardap shegýshini qutqarý múmkin bolmady.
Soltústik Qazaqstan oblysy polıtsııa departamenti baspasóz qyzmetiniń málimetinshe, oqys oqıǵa 9 qyrkúıekte Petropavlda bolǵan. Saǵat shamamen 21.30-da Qazaqstan Konstıtýtsııasy men Parkovaıa kósheleriniń qıylysynda jaıaý júrginshiler jolaǵymen joldy kesip ótpek bolǵan 2001 jylǵy Petropavl turǵynyn jeńil kólik soqqan. «Nissan Fuga» avtokóliginiń rýlinde 1996 jylǵy er adam bolǵan.
«Jol-kólik oqıǵasy saldarynan zardap shegýshi shuǵyl medıtsınalyq kómek kórsetý úshin medıtsınalyq mekemege jetkizildi, sol jerde alǵan dene jaraqattarynan qaıtys boldy. Alynǵan medıtsınalyq qorytyndyǵa sáıkes - júrgizýshi saý. Avtokólik arnaıy turaqqa qoıyldy.
Jol-kólik oqıǵasy faktisi QR QK 345-baby 3-b. «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy» boıynsha Sotqa deıingi tergep-tekserýdiń biryńǵaı tizilimine engizildi», - delingen baspasóz qyzmeti taratqan habarlamada.
Qazirgi ýaqytta sotqa deıingi tergeý júrgizilip, polıtseıler jol-kólik oqıǵasynyń mán-jaıy men sebepterin anyqtap jatyr. Birqatar saraptamalar taǵaıyndaldy. Anyqtaýdyń nátıjeleri boıynsha túpkilikti protsessýaldyq sheshim qabyldanbaq.
