Petropavlda jumys toby qurylyp, mektepterdiń qaýipsizdigin tekserip jatyr
Soltústik Qazaqstan oblysy bilim basqarmasynyń basshysy Názir Jáshibekovtyń aıtýynsha, 13 aqpan kúni Petropavldaǵy № 4 mektepte bolǵan oqys oqıǵaǵa qatysty jumys toby qurylǵan.
Ol bilim mekemeleriniń qaýipsizdik qurylǵylarymen qanshalyqty qamtylǵanyn tekseredi.
«Jumys toby mektepterde talapqa sáıkes beınekameralardyń bolýyn, bul quraldardyń ishki ister organdarynyń jedel basqarý ortalyǵyna nemese polıtsııa bólimsheleriniń jedel bólimderine qosylǵandyǵyn, mektepterdiń týrnıkettermen, dabyl túımeshesimen jaraqtandyrylýyn jáne mamandandyrylǵan kúzet qyzmetiniń jumys isteýin tekseredi. Tek osydan keıin ǵana naqty sharalar qolǵa alynady», - deıdi basqarma basshysy.
Tótenshe oqıǵa bolǵannan keıin eki saǵat ótkesin memlekettik satyp alý saıtynda № 4 mektepten beınekameralardy jedel basqarý ortalyǵyna qosý qyzmetine qatysty lot paıda bolǵan.
Biraq bul jaıynda oblystyq bilim basqarmasynyń basshysy jaýap bere almady.
Onyń aıtýynsha qazirgi ýaqytta komıssııa jumys istep jatyr. Nátıjesin aıtýǵa áli erte.
«№4 mektepke bıyl týrnıket alý jáne mamandandyrylǵan kúzet qyzmetimen kelisimge otyrý josparlanǵan. Jalpy mektepter talap boıynsha úsh kategorııaǵa bólingen. Birinshi sanatqa 300-ge jýyq oqýshysy bar, ekinshisine 700-ge jýyq jáne úshinshisine odan joǵary oqýshylary bar bilim mekemeleri qaraıdy. Olardyń árqaısysyna qoıylatyn talap bar. Máselen, birinshi sanatqa jatatyn mektepterge kirip-shyǵýdy basqarý júıesin qoıýdyń qajeti joq. Al jalpy oblysta osyndaı týrnıket ornatylýy tıis 50 mektep bar. Onyń 25-ine byltyr qoıylsa, bıyl qalǵan mektepterdi qamtý josparlanǵan. Mamandandyrylǵan kúzet qazir 23 mektepte bar. Talap boıynsha taǵy 27-de osyndaı kúzet bolýy tıis. Bul másele bıyl sheshiledi. Petropavl qalasy boıynsha ǵana mektepterdiń qaýipsizdik júıesin arttyrý úshin 100 mln teńge bólingen», - deıdi Názir Jáshibekov.
Oblys boıynsha qazir shaǵyn komplektili mektepterdi qosa eseptegende 465 bilim ordasy bar.
Onyń barlyǵy beınekameramen qamtylǵan, bul, shamamen 12 myń beınekameradan astam.
Al oqıǵa bolǵan № 4 mektepte 1959 jyly týǵan áıel kireberiste otyryp, vahterdiń qyzmetin atqarǵan. Kúzetshi túngi ýaqytta ǵana jumys istegen.
Basqarma basshysynyń aıtýynsha, búgin № 4 mektepte oqýshylar qashyqtan oqyp jatyr, erteńnen bastap dástúrli formatqa kóshedi.
Búgin Іshki ister vıtse-mınıstri Marat Qojaev Úkimet otyrysynda Petropavldaǵy oqys oqıǵa bolǵan mektep týraly aqparat berdi.
Sondaı-aq Іshki ister vıtse-mınıstri oqıǵanyń qalaı bolǵanyn aıtyp berdi.
