Petropavlda jumysshy JEO-2 aýmaǵynda joǵarydan qulap ketti

PETROPAVL. KAZINFORM — Petropavlda 2-Jylý-elektr ortalyǵy aýmaǵynda jumysshy abaısyzda joǵarydan qulap, aýyr jaraqat aldy.

Oqıǵa keshe saǵat 17.00 shamasynda bolǵan. «Sredazenergomontaj Petropavlovsk» JShS-niń 40 jastaǵy jumysshysy óndiristik nysanda josparly jumys barysynda abaısyzda tómenge qulaǵan. 

«Sredazenergomontaj Petropavl» JShS bas dırektory Maksım Býbleınıktiń aıtýynsha, zardap shekken jumysshyǵa shuǵyl túrde alǵashqy medıtsınalyq kómek kórsetilip, odan keıin ol qaladaǵy medıtsınalyq mekemege jetkizildi. Qazirgi ýaqytta onyń jaǵdaıy turaqty, qajetti emdeý sharalary júrgizilip jatyr.

— Qazaqstan Respýblıkasynyń zańnamasyna sáıkes osy oqıǵa boıynsha tergep-tekserý bastaldy. Bolǵan oqıǵanyń barlyq mán-jaıy men sebepterin anyqtaý úshin arnaıy komıssııa qurylady. Komıssııa jumysynyń nátıjeleri týraly qosymsha habarlaımyz. Zardap shekken azamat 4 razrıadty fýterovşık, biz oǵan mindetti túrde kómek beremiz, — dedi Maksım Býbleınık.

Soltústik Qazaqstan oblystyq densaýlyq saqtaý basqarmasy baspasóz qyzmetiniń málimetinshe, er adam qazir jansaqtaý bóliminde jatyr.

— Er adamda kúrdeli jaraqat. Bas súıek-mı jabyq jaraqatyn alǵan. Sol jaq shúıde-tóbe aımaǵynda ashyq jarasy bar. Sol jaqtaǵy qabyrǵalary synyp, ornynan yǵysqan. Sol jaq ókpesy janshylǵan. Sol jaq jambastyń syrtqy beti syrylǵan, — deıdi basqarmanyń baspasóz hatshysy Gúlnar Qalıeva.

Buǵan deıin Petropavldaǵy áýejaıǵa túngi reısterge ruqsat berilgenin jazǵan edik.