Petropavlda Jumysshy kenti men qala ortalyǵyn qosatyn avtoótkel bıyl qoldanysqa beriledi
PETROPAVL. KAZINFORM – Petropavlda Jumysshy kentimen qosatyn kópirdiń júktemesin azaıtý maqsatynda temirjol ústinen avtoótkel salynyp jatyr.
Jańa ótkel Jumysshy kentiniń Ýnıversal kóshesi boıynda salynyp jatyr. Joba quny 5 mlrd teńgeden asady. Qurylysy 2023 jyly bastalǵan mańyzdy nysan bıyl paıdalanýǵa berilmek.
Oblys ákimi Ǵaýez Nurmuhambetov salynyp jatqan avtomobıl ótkeliniń qurylys barysyn kórdi.
- Turǵyndarǵa qolaıly jaǵdaı jasaý úshin qolǵa alynǵan mańyzdy ınfraqurylymdyq nysan. Joba tek qoldanystaǵy kópirdiń júktemesin azaıtyp qana qoımaı, qalanyń soltústik-shyǵys bóligine balama kireberis joldy qamtamasyz etedi.
Qurylys alańynda oryndalǵan jumystardy kórip, merdigermen qazirgi mindetterdi talqylap, merzim men sapanyń qatań saqtalýyna nazar aýdardym. Jańa nysan bıyl qoldanysqa berilmek. Kópir qurylysy qysta da jalǵasady. Sonymen qatar, asfaltbeton jabyny, kirme joldar, qalalyqtardyń yńǵaılyǵy úshin jaıaý júrginshiler jolaǵy jáne baspaldaq salynady, - dedi óńir basshysy.
Joba aıasynda Ýnıversal jáne Koshevoı kósheleri de jónge keltirilip, keńeıtilmek.
- Avtomobıl ótkeli jáne kirme joldardyń qurylysy salynyp bitýge jaqyn. Shetki jáne aralyq tirekter qoıyldy. Injenerlik kommýnıkatsııalardy kóshirý aıaqtaldy. Tómende qıyrshyq tastarmen nyǵaıtý jumysy da qolǵa alynǵan. Qarjy boıynsha da másele joq, - deıdi merdiger kompanııa dırektory Rústem Týrjanov.
Petropavldaǵy Jumysshy kenti men qala ortalyǵyn qosatyn qazirgi kópir 1961 jyly salynǵan, uzyndyǵy 125 metr. Avtokólik aǵynynyń kóptiginen ótkel jylda qırap, jaryqtar paıda bolady.