Petropavlda jumysshy 800 keli metall tabaqtardyń arasynda qysylyp, aýyr jaraqattandy

PETROPAVL. KAZINFORM — Jazataıym oqıǵa Petropavldaǵy kásiporyndardyń birinde 4 naýryz kúni bolǵan.

Memlekettik eńbek ınspektsııasy komıtetiniń Soltústik Qazaqstan oblysy boıynsha departamentiniń málimetinshe, 45 jastaǵy kásiporyn qyzmetkeri kran-balka arqyly ólshemi 6×1,5 metr bolatyn metall tabaqtardy kóterý jumystaryn oryndaǵan. Olardyń jalpy salmaǵy shamamen 800 kg bolǵan.

Metalldy kóterý kezinde júk ilgegi saqınadan syrǵyp ketip, saldarynan metall tabaǵy búıirimen qulaǵan. Osy kezde jumysshy olardyń arasynda qalyp, qysylyp qalǵan.

Oqıǵa ornyna jedel medıtsınalyq járdem brıgadasy shaqyrylyp, zardap shekken qyzmetker emdeý mekemesine jetkizildi.

Qazir oqıǵanyń mán-jaıyn anyqtaý úshin arnaıy komıssııa qurylyp, tergeý jumystary júrgizilip jatyr. 

SQO polıtsııa departamenti Ǵabıt Músirepov kóshesinde ornalasqan kásiporyndardyń biriniń aýmaǵynda qyzmetkerdiń jaraqat alý faktisi boıynsha sotqa deıingi tergep-tekserýdi bastady.

— Oqıǵanyń barlyq mán-jaıyn jan-jaqty jáne tolyq anyqtaýǵa baǵyttalǵan tergeý áreketteri júrgizilip jatyr, — dedi vedomstvonyń baspasóz qyzmetinde.

SQO densaýlyq saqtaý basqarmasy baspasóz qyzmetiniń málimetinshe, Petropavldaǵy kópsalaly qalalyq jedel medıtsınalyq járdem aýrýhanasyna 45 jastaǵy er adam aýyr jaǵdaıda jetkizildi. Naýqasta travmatıkalyq shok bolǵan.

— Er adam birden jansaqtaý jáne qarqyndy terapııa bólimine jatqyzyldy. Er adamnyń sol jaq qabyrǵalary birneshe jerden synǵan, júregi jáne ókpesi soǵylǵan. Qazir zaqymdanýlardy naqtylaý úshin qajetti dıagnostıkalyq sharalar júrgizilip jatyr. Qazir naýqastyń jaǵdaıy aýyr kúıinde qalyp otyr. Ol barlyq qajetti emdi qabyldap jatyr, — deıdi basqarmanyń baspasóz hatshysy Gúlnar Qalıeva.

Buǵan deıin Pavlodar óńirinde sońǵy úsh jylda óndiristegi jazataıym oqıǵalardan 20 adam kóz jumǵanyn jazǵan edik.