Petropavlda júk kóligi kópirdi zaqymdap, qozǵalys ýaqytsha toqtatyldy
PETROPAVL. QazAqparat – Petropavlda júrgizýshi kóligine tıelgen júktiń bıiktigin eskermeı, saldarynan kópir konstrýktsııasynyń bir bóligin julyp tústi, dep habarlaıdy QazAqparat tilshisi.
Soltústik Qazaqstan oblysy Polıtsııa departamenti baspasóz qyzmetiniń málimetinshe, oqys oqıǵa búgin saǵat 15.00 shamasynda boldy. «Mercedes» júk kóliginiń 1985 jyly týǵan júrgizýshisi tirkemesindegi metal qurylymmen Esil ózeninen ótetin kópirdiń kóldeneń arqalyǵyn julyp ketken.
Polıtsııa qyzmetkerleri birden joldy jaýyp, apat ornyna «Qazavtojol UK» jáne «Qazavtodor» AQ SQOF basshylyǵy jáne kólik baqylaý ınspektsııasynyń ókilderi jetti.
«Kólik júrgizýshisine «Kólik quraldary júrgizýshileriniń jol qaýipsizdigin qamtamasyz etýdiń belgilengen erejelerin buzýy» baby boıynsha jáne júkti tasymaldaýshy «Tral15» jeke kásipkerligine «Jolaýshylardy, bagajdy jáne júkterdi tasymaldaý erejelerin buzý» baby boıynsha eki ákimshilik hattama toltyryldy», - deıdi baspasóz qyzmeti mamandary.
Qazirgi ýaqytta kópirdiń zaqymdanǵan bóligi zerttelip jatyr. Jol qozǵalysy jaqyn arada qalpyna keledi.
