Petropavlda júk kóligi dúkenge kirip ketti
PETROPAVL. QazAqparat – Petropavlda júk kóliginiń tejegishi isten shyǵyp, dúkenge kirip ketti, dep habarlaıdy QazAqparat tilshisi.
Soltústik Qazaqstan oblysy Polıtsııa departamenti baspasóz qyzmetiniń málimetinshe, oqıǵa 4 qarasha kúni saǵat 16.00 shamasynda Petropavldaǵy Hımenko kóshesiniń boıynda bolǵan. Saýda úıiniń janynda qol tejegishinde turǵan beton aralastyrǵyshy bar júk kóligi ózdiginen jyljyp, «Amega» qurylys dúkenine kirip ketken. Zardap shekkender joq. Keltirilgen shyǵynnyń mólsheri naqtylanyp jatyr.
«Jol-kólik oqıǵasy boıynsha Petropavl qalasy polıtsııa basqarmasy patrýldik polıtsııa batalonynyń anyqtaýshysy ákimshilik materıal jınap, ákimshilik polıtsııa bólimine tapsyrdy. Qosymsha jınalǵan materıaldardyń qorytyndysy boıynsha júrgizýshiniń quqyqtyq jaýapkershiligi týraly sheshim qabyldanady», - delingen vedomstvo aqparatynda.
