Petropavlda Joshy Ulysynyń 800 jyldyǵyna arnalǵan kórme ótti

ASTANA. KAZINFORM — Petropavl qalasynda «Altyn Orda (Joshy Ulysy) kezeńiniń tarıhı-mádenı murasy» atty kórme ótti. Kórme Joshy Ulysynyń 800 jyldyǵyna oraı uıymdastyryldy. Bul týraly QR Mádenıet jáne aqparat mınıstrligi habarlady.

— Kórmege Ulytaý ulttyq tarıhı-mádenı jáne tabıǵı mýzeı-qoryǵynyń qorynan tarıhı qundy jádigerler qoıyldy. Olardyń qatarynda Altyn Orda kezeńine jatatyn kesenelerdiń órnektelgen kirpishteri, sol ýaqyttaǵy tarıhı tulǵalardyń balaýyz músinderi, Joshy han kesenesiniń maketi, sondaı-aq ortaǵasyrlyq monetalar, eski kartalar men basqa da tarıhı qundy jádigerler boldy, — delingen aqparatta.

Qazirgi ýaqytta Ulytaý ulttyq tarıhı-mádenı jáne tabıǵı mýzeı-qoryǵynda Altyn Orda dáýirine jatatyn 10-nan astam tarıhı eskertkish saqtalǵan. Atap aıtsaq, Joshy hannyń kesenesi, Bolǵan Ana, Qulan Ana, Aıaqqamyr jáne basqa da mańyzdy eskertkishter bar.

Bul kórme buryn Astana, Almaty, Túrkistan jáne Jezqazǵan qalalarynda uıymdastyryldy. Kórmeniń ashylý saltanaty Almaty qalasynda ótti.