Petropavlda jolǵa jatyp alǵan áıeldi qaǵyp óltirgen júrgizýshi sottaldy

PETROPAVL. KAZINFORM — Petropavl qalalyq soty jol-kólik oqıǵasy saldarynan adam ólimine ákelip soqqan jáne oqıǵa ornyn tastap ketken júrgizýshige qatysty qylmystyq isti qarap, úkim shyǵardy.

Soltústik Qazaqstan oblystyq soty baspasóz qyzmetiniń málimetinshe, aıyptalýshyǵa QR Qylmystyq kodeksiniń 345-baby 3-bóligi «Abaısyzda adam ólimine ákep soqqan Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy» jáne 347-baby «Jol-kólik oqıǵasy bolǵan jerden ketip qalý» boıynsha aıyp taǵyldy.

Oqıǵa byltyr 30 naýryz kúni saǵat 19:30 shamasynda bolǵan. K. esimdi er adam «Lada Granta» avtokóligimen Petropavldaǵy Ýkraınskaıa kóshesimen kele jatqan. Qaýipsiz jyldamdyqty saqtamaǵan ol joldyń ústinde jatqan N. A. Mıhaılınany qaǵyp ketken. Aýyr jaraqat alǵan áıel oqıǵa ornynda kóz jumdy. 

Jol-kólik oqıǵasynan keıin K. jol qozǵalysy erejelerin buzyp, apat ornyn tastap ketken. Sotta K.-nyń kinási tolyq dáleldendi.

Memlekettik aıyptaýshy K.-ny 2,6 jylǵa bas bostandyǵynan aıyrýdy, kólik quralyn basqarý quqyǵynan 2,6 aıǵa aıyrýdy surady. Jazany ortasha qaýipsizdik mekemesinde óteý usynyldy.

Zardap shegýshiniń ókili aıyptalýshyny bas bostandyǵynan aıyrmaýdy surady. K. óz kinásin ishinara moıyndady jáne jazany jeńildetýdi surady.

Sot K.-nyń jaýapkershiligin jeńildetetin mán-jaı retinde onyń kámeletke tolmaǵan balalary baryn, sondaı-aq oqıǵaǵa qaıtys bolǵan adamnyń da erejeni buzýy sebep bolǵanyn eskerdi. Jaǵdaıdy aýyrlatatyn jaıttar anyqtalǵan joq.

Sot qylmystyq quqyqbuzýshylyqtardyń jıyntyǵy boıynsha 2 jyl 6 aı merzimge bas bostandyǵynan aıyrý jazasyn kesti. Sonymen qatar, K. 2 jyl 6 aı merzimge kólik quralyn basqarý quqyǵynan aıyryldy.

Sot úkimi zańdy kúshine engen joq.

Buǵan deıin SQO-da aýyl sharýashylyǵy sanaǵy kezinde 92 myńnan astam nysan qamtylatyndyǵyn jazǵan edik.