Petropavlda joldan ótip bara jatqan anasy men qyzyn kólik qaǵyp ketti
PETROPAVL. QazAqparat – Petropavlda kólik júrgizýshisi júrginshiler ótkelinen ótip bara jatqan anasy men qyzyn abaısyzda qaǵyp ketti, dep habarlaıdy QazAqparat tilshisi.
Oqys oqıǵa jaıynda áleýmettik jelide jarııa boldy.
Petropavl qalalyq polıtsııa basqarmasynyń málimetinshe, jol-kólik oqıǵasy búgin saǵat 14.00 shamasynda bolǵan. Ýálıhanov kóshesindegi júrginshiler ótkeli arqyly joldy kesip ótip bara jatqan eki adamdy Audi 100 avtokóliginiń 52 jastaǵy júrgizýshisi qaǵyp ketken.
Oqıǵa kýágerleri birden jedel járdem qyzmetin shaqyrdy. Zardap shekkender 32 jastaǵy áıel men onyń 8 jasar qyzy. Olarǵa emdeý mekemesinde medıtsınalyq kómek kórsetilip, keıin úılerine jiberildi.
Jol-kólik oqıǵasyna baılanysty ákimshilik materıal jınalyp, ákimshilik polıtsııa bólimine protsessýaldyq sheshim qabyldaý úshin berildi.
