Petropavlda jolaýshylar avtobýsy oqýshyny qaǵyp ketti
PETROPAVL. QazAqparat – Petropavlda jolaýshylar avtobýsy qala kósheleriniń birinde oqýshy qyzdy qaǵyp ketti, dep habarlaıdy QazAqparat tilshisi.
SQO Polıtsııa departamentiniń baspasóz qyzmetinen málim etkendeı, 13 qarasha kúni qalada jaýǵan alǵashqy qar saldarynan jasóspirimder zardap shekken eki jol-kólik apaty boldy.
Oblys ortalyǵyndaǵy Internatsıonal, Batyr Baıan jáne Egemen Qazaqstan kósheleriniń qıylysynda 4-synyp oqýshysy zardap shekti. Ony Petropavl qalasynyń 49 jastaǵy turǵyny, avtobýs júrgizýshisi soǵyp ketti.
Ekinshi oqıǵa Shýhov – Naberejnyı kóshelerinde boldy. «Nıva Chevrolet» avtokóliginiń 18 jastaǵy júrgizýshisi jaıaý júrginshi jolaǵynda 16 jastaǵy boıjetkendi qaqty.
Zardap shekkenderge medıtsınalyq kómek kórsetildi. 4-synyp oqýshysy aýrýhanaǵa jatqyzyldy. Eki kólik te arnaıy turaqqa qoıyldy. Al júrgizýshilerdiń ústinen ákimshilik is qozǵaldy.
«Jolda, ásirese qar men kóktaıǵaqta asa saq bolý qajet. Kólik júrgizýshileri, sonyń ishinde qoǵamdyq kólik júrgizýshileri jyldamdyqty, joldyń jaǵdaıyn, kóshe qıylysynyń konfıgýratsııasyn eskerýleri qajet. Qar jańa jaýǵan kezde jyldamdyqty saǵatyna 40-45 shaqyrymnan asyrmaǵan jón. Júrginshiler de kóktaıǵaqta kóliktiń birden toqtaı almasyn esten shyǵarmaýlary kerek. Sol sebepti baǵdarshamnan óterde de jan-jaqqa qarap alyp, qaýipsiz bolǵanda ǵana ótý kerek», - deıdi SQO PD Jergilikti polıtsııa qyzmeti basqarmasynyń bastyǵy Aıdyn Baımatov.
Oqys oqıǵalardyń aldyn alý maqsatynda patrýldik polıtseıler balalar kóp júretin jerlerde tańerteńnen túske deıin kezekshilik etedi.
