Petropavlda jolaýshy tasymaldaýshylar kóshedegi avtobýstardyń sanyn eki ese qysqartpaq
PETROPAVL. KAZINFORM – Petropavlda qoǵamdyq kólik sany eki ese qysqarýy múmkin. Jolaýshy tasymaldaýshylar shyǵynǵa batyp jatyrmyz dep qalalyq máslıhat depýtattaryna hat jazdy.
«Soltústik Qazaqstan oblysynyń Avtokólik odaǵy» qaýymdastyǵynyń tóraǵasy Galına Semenovanyń aıtýynsha, bıyl oblys jáne qala ákimdigimen áriptestik aıasynda 60 qosymsha avtobýs satyp alynýy kerek bolǵan. Osy maqsatqa óńir bıýdjetinen 2 mlrd teńge bólindi. Alaıda kóktemgi tasqynǵa baılanysty bul qarajat basqa maqsatqa jumsalyp ketken.
Budan bólek bıyl avtotasymaldaýshylardyń shyǵynyn jabý úshin oblystyq bıýdjetten 2,7 mlrd teńge bólingen.
«Oblys jáne qala basshylyǵymen kezdesýde tasymaldaýshylarǵa múmkindiginshe óz kúshterimen avtobýs parkterin jańalaý usynyldy. Sol jerde eger jańadan avtobýstar alynsa, sýbsıdııalaýǵa qosymsha qarjy bólinetindigi kelisildi. Bul tasymaldaýshylardyń shyǵynyn jáne jańa avtobýstardyń lızıngtik tólemderin jabýy tıis edi. Bıyl, qıyndyqtarǵa qaramastan, tasymaldaýshylar 31 avtobýs satyp aldy. Buǵan deıin berilgen 2,7 mlrd teńge jyl sońyna deıin barlyq shyǵyndy jabýǵa jetpeı otyr. Osy jyldy jabý úshin áli 650 mln teńge jáne keler jylǵa 3,3 mlrd teńge qajet», - deıdi Galına Semenova.
Jyldy shyǵynsyz aıaqtaýǵa jetpeı turǵan qarajat berilmegen jaǵdaıda jolaýshy tasymaldaýshylar qazir qala kóshelerinde júrgen avtobýstar sanyn 50% qysqartpaq.
«Jergilikti bıýdjetten tolyq qarjylandyrylmaǵandyqtan, tasymaldaýshylar janar-jaǵarmaıdy qaryzǵa alýǵa májbúr. Saldarynan kásiporyndar qyzmetkerlerine eńbekaqy tóleı almaýlary múmkin. Bul qaladaǵy qalypty jolaýshy tasymalyna keri áser etpek. Avtobýs sany qysqarsa, júrgizýshiler sany da qysqarady», - delingen hatta.
Qaýymdastyq tóraǵasy avtobýstarda tegin júretin azamattardyń belgili bir sanaty úshin de Petropavl qalalyq ákimdigi kelisim boıynsha qarajat tólemeı otyrǵanyn aıtady. Sýbsıdııadan bólek berilýi tıis qarajatty jolashý tasymaldaýshylar maýsym aıynan beri almaǵan.
Buǵan deıin SQO-da maıdangerge Belarýs eliniń medali tabys etilgenin jazǵan edik.
