Petropavlda jol júrý bıletinde óreskel qate jiberildi

ASTANA. QazAqparat - Petropavl qalasyndaǵy shilde aıyna arnalǵan bir aılyq jol júrý bıletinde «maýsym» aıy dep qate jazylyp ketken. «VKontakte» jelisindegi «Tıpıchnyı Petropavlovsk» tobynda jarııalanǵan bılettiń sýretin kópshilik talqylady, dep habarlaıdy «QazAqparat» HAA tilshisi.

Bıletti basyp shyǵarýshylar maýsym men shilde aıyn aıyra almaı qalǵan kórinedi. Endi keler shilde aıynda bir aılyq jol júrý bıletin satyp alǵan petropavldyqtar «maýsym» dep jazylǵan bıletpen qatynaıtyn boldy. Jaýapty «SKO Avtotransportnyı soıýz» qaýymdastyǵynyń ókilderiniń habarlaýynsha, qatelikti baspahana jibergen.

«Ókinishke oraı, baspahana osyndaı qatelikke jol berdi. Qazirgi tańda shilde aıynyń bıleti «maýsym» dep jazylyp ketse de, avtobýstarda barynsha bul bılettiń jaramdy ekeni týraly aqparat taratyp jatyrmyz. Qatelik jibergen tıpografııa bılettiń jaramdylyǵy týraly aqparattardy bizge shyǵaryp berip jatyr. Áleýmettik jeli arqyly halyqqa túsindirip jatyrmyz. Barlyq júrgizýshiler eskertildi. Bılet satyp alǵan adamdar eshqandaı qıyndyqqa tap bolmaıdy», - dep habarlady qaýymdastyq.

Aıan Bekenuly