Petropavlda jol salý barysynda bıýdjetke 2 mlrd teńge zalal keltirgen kúdikti ustaldy
PETROPAVL. KAZINFORM – Petropavlda avtomobıl ótpe jolyn salý kezinde 2 mlrd teńgeniń qoldy bolǵany anyqtaldy.
Qarjylyq monıtorıng agenttiginiń Soltústik Qazaqstan oblysy boıynsha departamenti bıýdjet qarajatyn jymqyrý deregi boıynsha sotqa deıingi tergep-tekserýdi júrgizip jatyr.
Vedomstvonyń málimetinshe, 2023 jyldyń tamyz aıynda Petropavl qalasy ákimdiginiń turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bólimi men «BÝKA» JShS arasynda jalpy quny 5,4 mlrd teńgege avtojol ótpejolyn salý týraly kelisimshart jasalǵan.
Alaıda, merdiger uıym kelisimshart talaptaryn oryndaý barysynda jumys kestesinen júıeli túrde keshigip otyrǵan. Tergeý derekterine sáıkes, kompanııa dırektory tapsyrys berýshi taraptyń laýazymdy tulǵalarymen sóz baılasyp, naqty oryndalǵan jumys kólemi týraly jalǵan málimet jazylǵan aktilerdi rásimdeýdi uıymdastyrǵan.
Osy qujattardyń negizinde merdiger uıymnyń esepshotyna bıýdjet qarajaty zańsyz aýdarylǵan. Saldarynan memleketke 2 mlrd teńgeden astam shyǵyn kelgen.
Sot sanktsııasymen jalpy quny 270 mln teńgeden asatyn 24 avtokólik pen arnaıy tehnıkaǵa tyıym salyndy. Sonymen qatar, kúdiktige qatysty qamaýda ustaý túrindegi bultartpaý sharasy qoldanyldy.
Qazirgi ýaqytta tergep-tekserý amaldary jalǵasyp jatyr. Qazaqstan Respýblıkasynyń Qylmystyq-protsestik kodeksiniń 201-babyna sáıkes ózge aqparat jarııa etýge jatpaıdy.
Buǵan deıin Petropavlda temirjol ústinen jańa avtomobıl kópiri salynyp jatqanyn jazǵan edik.
