Petropavlda jol polıtsııasynyń ǵasyrlyq avtokóligi murajaıda saqtaýly tur
PETROPAVL. QazAqparat - Soltústikqazaqstandyq jol polıtsııasynyń murajaıy naýryzdyń 1-nen bastap óz jumysyn qaıta jandandyrdy. Ekskýrsııany kelýshilerge budan bylaı ardagerlerdiń ózderi júrgizetin bolady, dep habarlaıdy QazAqparat tilshisi.
SQO polıtsııa departamenti baspasóz qyzmetiniń habarlaýynsha, murajaı 1997 jyly Qazaqstannyń jol polıtsııasynyń bes jyldyǵyna oraı arnaıy ashylǵan. SQO PD murajaıynyń meńgerýshisi Lıýbov Osınskaıanyń aıtýynsha, búginde jańartylǵan murajaıda jol polıtsııasynyń tarıhy, balalardyń jol-kólik jaraqatynyń aldyn alý zaly men osy qyzmettiń Qazaqstan Táýelsizdik alǵan jyldary qurylýynan syr shertetin bólimderden turatyn úsh zal bar. Munda myńǵa tarta jádiger ornalasqan. Sırek kezdesetin fotosýretterdi, qujattardy, qurylǵylardy, tipti ótken ǵasyrdyń basynda MAI qyzmetkerleriniń qoldanysynda bolǵan tanymal kólikterdiń biri - «Moskvıchti» kórýge bolady. Al, polıtsııanyń búgingi tarıhy kórsetiletin zalda 2011 jyldyń kúzinde Taraz qalasynda qaýipti qylmyskerdi toqtatyp, óz ómirin qurban etken polıtsııa kapıtany Ǵazız Baıtasovtyń bylǵary kýrtkasy men fýrajkasy saqtaýly tur.
«Bólek stendte oblysymyzda alǵashqy avtobýstardyń, baǵdarshamdardyń paıda bolý tarıhy kórsetilgen. Qyzyqty ekspozıtsııalar qoıylǵan mundaı murajaılar elimizde saýsaqpen sanarlyq», - deıdi ishki ister organdarynyń ardageri, otstavkadaǵy polkovnık Evgenıı Raıtenbah.
Oblystyq Polıtsııa departamenti basshylyǵynyń nusqaýy boıynsha budan bylaı bul murajaıda patrýldik jáne ákimshilik qyzmetke kelgen ofıtserler men serjanttar úshin aıyna bir ret ekskýrsııa ótkizilip turady.
Jol polıtsııasy murajaıynyń esigi oblys aýdandary men qala mektepteriniń oqýshylary jáne stýdentter úshin árdaıym ashyq. Ekskýrsııaǵa qatysam degender 39-93-11 telefony arqyly jazyla alady.
