Petropavlda jol-kólik oqıǵasynan 12 jasar qyz kóz jumdy
PETROPAVL. KAZINFORM — Jasóspirim qyz joldy belgilenbegen jerden júgirip ótpek bolyp, abaısyzda kólik astyna túsken bolýy múmkin.
Soltústik Qazaqstan oblysy polıtsııa departamenti baspasóz qyzmetiniń málimetinshe, oqıǵa 25 mamyr kúni saǵat 20.16 shamasynda Petropavldaǵy Potanın kóshesinde bolǵan. Porsche Cayenne avtokóligin basqarǵan 24 jastaǵy júrgizýshi kámeletke tolmaǵan jaıaý júrginshini qaǵyp ketken.
Aýyr jaraqat alǵan 12 jastaǵy qyz oqıǵa ornynda kóz jumdy. Júrgizýshi ýaqytsha ustaý ızolıatoryna qamaýǵa alyndy. Kóligi aıyp turaǵyna qoıyldy. Saraptama jigittiń alkogoldik ishimdikti tutynbaǵanyn kórsetti.
Oqıǵanyń mán-jaıy anyqtalady, qazir osy fakti boıynsha tergeý júrgizilip jatyr.
Polıtsııa departamenti jol qozǵalysyna qatysýshylardy qaýipsizdik sharalaryn qatań saqtaýǵa, jolda muqııat bolýǵa jáne jol qozǵalysy erejelerin múltiksiz oryndaýǵa shaqyrdy.
Buǵan deıin Taldyqorǵanda joǵalyp ketken balanyń denesi Qaratal ózeninen tabylǵanyn jazǵan edik.
