Petropavlda jol-kólik oqıǵasynda zardap shekken úsh balanyń bireýine ota jasaldy
PETROPAVL. QazAqparat – Petropavlda dárigerler jol-kólik oqıǵasynda aýyr jaraqat alǵan balalardyń jaǵdaıy týraly aıtyp berdi. Bireýine ota jasalsa, ekeýi jansaqtaý bólimshesinen shyǵaryldy, dep habarlaıdy QazAqparat tilshisi.
Petropavldyń Jumysshy kentinde jeńil kólik júrgizýshisi rýlge ıe bola almaı qalyp, adamdar turǵan aıaldamaǵa soǵyldy. Saldarynan bir áıel, úsh bala aýyr jaraqat aldy.
Soqqan kólikten japyrylyp qalǵan pavılon astynda qalǵan balalardyń ekeýiniń jasy 7-de, úshinshisiniń jasy – 12-de. Olardyń barlyǵy oblystyq kópsalaly balalar aýrýhanasyna jedel járdem qyzmetimen jetkizildi.
«Egizder aldymen hırýrgııa bólimshesinde tekserildi, olardyń aldyńǵy qursaq qabyrǵasy soǵylyp, ishine zaqym kelgeni anyqtalǵandyqtan, jansaqtaý bólimshesine aýystyryldy.
12 jasar bala jaraqat bólimshesinde qaraldy, onyń oń san súıegi ashyq synǵan, tize býynyna deıin úlken jaraqat bar, bas súıek-mıyna zaqym kelgen. Jasóspirim jansaqtaý bólimshesine jatqyzyldy. Bul balaǵa jedel túrde ota jasalyp, san súıegine metall qurylǵy qoıyldy. Óıtkeni súıegi synyp, synyqtary ornynan jyljyp ketken. Ota eki saǵatqa jalǵasty. Alaıda aýyr jaraqat bul emes, balanyń sanynan tize býynyna deıin jyrylyp, eti julynǵan. Jaraqat 40 sm shamasynda. Qalpyna kelýi úshin birneshe aı kerek», - deıdi oblystyq kópsalaly balalar aýrýhanasynyń dárigeri Shyńǵys Nurǵalıev.
Dárigerdiń aıtýynsha, jasóspirim áli kúnge jansaqtaý bólimshesinde jatyr, jaǵdaıy turaqty túrde aýyr. Biraq esin biledi, ózdiginen dem alyp jatyr. Densaýlyǵynda oń ózgeris bar.
«7 jastaǵy egizder hırýrgııa bólimshesine aýystyryldy. Jaǵdaılary ortasha aýyr.
Qazirgi ýaqytta jaraqat alǵan balalar týraly qandaı da bir boljam jasaýǵa erte. Ómirlerine qaýip joq», - deıdi Shyńǵys Nurǵalıev.
