Petropavlda jol apatynan bir adam qaza taýyp, úsheýi jaraqattandy
PETROPAVL. QazAqparat – Petropavldyń aınalma jolynda eki jeńil kólik soqtyǵysyp, bir jolaýshy mert boldy, taǵy úsheýi aýyr jaraqatpen aýrýhanaǵa jetkizildi, dep habarlaıdy QazAqparat tilshisi.
Soltústik Qazaqstan oblysy Polıtsııa departamenti baspasóz qyzmetiniń málimetinshe, jol-kólik oqıǵasy keshe túski saǵat 14:30 shamasynda Petropavl aınalma jolynda, ıaǵnı R-49 respýblıkalyq avtojolynyń 12-shaqyrymynda Jumysshy kentine kireberiste bolǵan. «Toyota Alphard» jáne «Nissan Patrol» avtokólikteri soqtyǵysqan.
Jol-kólik oqıǵasy saldarynan «Toyota Alphard» avtokóliginiń 71 jastaǵy jolaýshysy qaza tapty, taǵy úsh jolaýshy qaladaǵy medıtsınalyq mekemelerge jetkizildi.
Atalǵan fakti QR Qylmystyq kodeksiniń 345-baby 3-bóligi («Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy») boıynsha sotqa deıingi tergep-tekserýlerdiń biryńǵaı tizilimine engizildi. Tıisti anyqtaý jumystary júrgizilip jatyr.
Áleýmettik jelide oqıǵa ornynda túsirilgen vıdeo tarady. Kýá bolǵandardyń aıtýynsha, júrgizýshi jyldamdyqty saqtamaǵan.
Sondaı-aq búgin Petropavl mańyndaǵy eldi mekenderdiń birinde joldy júrginshiler jolaǵy arqyly kesip ótpek bolǵan áıeldi kólik qaǵyp ketti. Jol-kólik oqıǵasynyń beınejazbasy áleýmettik jelide tarady. Ázirge bul derek jaıynda polıtsııa departamenti túsinik bergen joq.
Buǵan deıin Oralda mas júrgizýshi kóligimen qaǵyp ketken áıeldiń jansaqtaý bólimine túskenin aıtqan edik. Júrginshiler jolaǵymen ótip bara jatqan 46 jastaǵy oblys ortalyǵynyń turǵynyn «Jıgýlı» avtokóliginiń júrgizýshisi qaǵyp ketken. Áıel aýyr jaraqat aldy.
