Petropavlda joǵalǵan kólik apatqa ushyrap, eki adam zardap shekti
PETROPAVL. QazAqparat – Petropavlda joǵalǵan jeńil kólik Aqqaıyń aýdanynda kúıgen qalpynda tabyldy. Janynda zardap shekken adamdar bolǵan, - dep habarlaıdy QazAqparat tilshisi.
Soltústik Qazaqstan oblysy polıtsııa departamenti baspasóz qyzmetiniń málimetinshe, 24 maýsym kúni tańerteń Petropavl polıtsııasyna qala turǵyny kelip, túnde bireýlerdiń «Audi S4» avtokóligin aıdap áketkeni týraly aıtqan.
Tártip saqshylary birden iske kirisip, baqylaý-ótkizý pýnkteri, aýmaqtyq bólinister baǵdarlandy. Nátıjesinde Aqqaıyń aýdany polıtsııa bóliminiń qyzmetkerleri Qııaly aýylynyń mańyndaǵy jolda joǵalǵan kólikke uqsaıtyn janyp ketken mashınany tapty.
Aýdandyq polıtsııa bóliminiń bastyǵy Rýslan Saparovtyń aıtýynsha, kólik qasynda jol-kólik oqıǵasynda zardap shekken eki adam bolǵan. Ekeýi de jedel járdemmen aýdan ortalyǵy Smırnovtaǵy medıtsınalyq mekemege jetkizildi.
Atalǵan fakti Sotqa deıingi tergep-tekserýdiń biryńǵaı tizilimine «Avtomobıldi nemese ózge de kólik quralyn jymqyrý maqsatynsyz quqyqqa syıymsyz ıelenip alý» baby boıynsha engizildi. Tergeý júrgizilip jatyr.
