Petropavlda joǵalǵan keıýana bes kúnnen keıin ormannan tabyldy
PETROPAVL. QazAqparat – Petropavldyń iz-túzsiz ketken 75 jastaǵy turǵyny bes kún boıy izdestirilip, ormannan aman-esen tabyldy, dep habarlaıdy QazAqparat tilshisi.
Soltústik Qazaqstan oblysy Polıtsııa departamenti baspasóz qyzmetiniń málimetinshe, 21 tamyz kúni polıtsııaǵa Petropavl turǵyny aryzdanady. Aıtýynsha, onyń 1945 jyly týǵan anasy saǵat 10 kezinde shyǵyp ketip, úıge qaıtyp oralmaǵan. Keıýana umytshaq aýrýymen aýyrady eken.
Áıeldi izdeýge birden polıtsııanyń kúshteri jumyldyryldy. Kelesi kúni joǵalǵan adamnyń belgileri týraly aqparat aýdandyq bólimshelerge taratyldy. Birinshi kezekte keıýana barýy múmkin Jumysshy kenti, «Jas órken» yqsham aýdandary tekserildi. Ol nátıje bermegesin saıajaı, qala mańynan izdeý jalǵasty. Kómekke Lider.kz qoǵamynyń volonterleri kelip, áleýmettik jeli arqyly habarlandyrý berildi.
25 tamyz kúni Petropavldan 40 shaqyrymdaı jerde, Mamlıýtka qalasynyń mańyndaǵy ormandardyń birinde áıeldi qoryqshy Maksım Petrov kóredi. Ábden sharshaǵan keıýana qaıdan kele jatqanyn, qaıda bara jatqanyn aıta almaǵan. Orman sharýashylyǵynyń qyzmetkeri birden polıtsııaǵa habar berip, áıel aýdandyq polıtsııa bólimine jetkizildi. Sol jerde onyń aty-jóni anyqtalyp, Petropavl qalalyq polıtsııa basqarmasy men týǵan-týystaryna habar berildi.
«Keıýana 5 kún boıy qaıda bolǵanyn aıta almady. Volonterlerge, áleýmettik jeli ákimgerlerine – aman-esen tabýǵa kómektesken barlyǵyna alǵys bildiremin. Umytshaqtyqpen aýyratyn adamdardy izdep-tabý qıyn. Olardyń qaı baǵytta ketkenin anyqtaý múmkin emes. Sol sebepti mundaıda eriktilerdiń kómegi zor», - deıdi SQO PD bastyǵynyń orynbasary Rýslan Nazarov.
