Petropavlda joǵalǵan eki oqýshy tabyldy
PETROPAVL. QazAqparat – Petropavl qalasynyń turǵyny 16 jastaǵy qyzynyń birneshe kún úıge qonbaǵanyna mán bermeı, polıtsııaǵa júginbegen, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, mekteptiń polıtsııa ınspektory jasóspirim qyzdyń joǵalǵanyn 3 sáýir kúni onyń otbasyna barǵan kezde anyqtaǵan. Aıta ketsek, osy kúni Petropavlda karantın rejımi jarııalanǵan bolatyn. Birden polıtsııanyń jeke quramy jumyldyrylyp, izdeý jumystary bastalǵan. Keshke taman tártip saqshylary oqýshyny qurbylarynyń biriniń úıinen tapty. Anasynyń aıtýynsha, 16 jastaǵy jasóspirim buǵan deıin de úıinen birneshe ret eskertýsiz ketip qalǵan eken. Sol sebepti asa qatty alańdamaǵan.
ıÝvenaldy polıtseıler áıelmen profılaktıkalyq áńgime júrgizdi. Qyzy tótenshe jaǵdaı rejımin buzǵany úshin oǵan ákimshilik hattama toltyryldy.
Budan bólek, polıtseıler tótenshe jaǵdaıǵa qaramastan, úıinen serýendeýge shyǵyp ketip, birneshe saǵatqa joǵalǵan balany da izdep tapty. 2 sáýir kúni polıtsııaǵa 11 jasar balanyń ata-anasy habarlasty. Balanyń joǵalǵany týraly aqparat krımınaldyq polıtsııa bóliminiń, ýchaskelik polıtsııa pýnktiniń qyzmetkerleri men patrýldik ekıpajdarǵa joldandy. Bir saǵat boıy toqtaýsyz júrgizilgen izdestirý jumystarynyń nátıjesinde jasóspirim serýendep júrgen jerinen tabyldy.
«Jyl basynan oblysta 10 jasóspirim joǵaldy. Kóbine balalar jaqyndarynyń ýaıymdaıtynyn umytyp, oınap júrip alady. Olardyń barlyǵy tabyldy. Joǵalǵan adamdardy izdestirýde eriktilerdiń kómegin erekshe atap ótýge bolady. Bizdiń qyzmetkerler olardyń jetekshilerimen únemi baılanysta. Balalardy izdestirý jumystaryna eriktiler jıi tartylady», - deıdi SQO PD Krımınaldyq polıtsııa basqarmasynyń bastyǵy Petr Klımov.
Jalpy jyl basynan SQO polıtseıleri iz-túzsiz joǵalǵan adamdar týraly 38 aryz qabyldady. Olardyń barlyǵy tabyldy. Tártip saqshylarynyń aıtýynsha, spırttik ishimdikterge áýes adamdar jıi joǵalady eken. Ádette olar bótelkeles tanystarynyń qasynan tabylyp jatady. Alaıda, tótenshe jaǵdaıǵa baılanysty shekteýler engizilgeli jáne kóńil kóterý oryndary jabylǵaly adamdardyń joǵalý faktileri tirkelmegen.
