Petropavlda joǵalǵan eki balany 120 adam túni boıy izdedi
PETROPAVL. QazAqparat – Petropavlda joǵalǵan eki bala aman-esen tabylyp, ata-anasyna tapsyryldy, dep habarlaıdy QazAqparat tilshisi.
Soltústik Qazaqstan oblystyq polıtsııa departamenti baspasóz qyzmetiniń málimetinshe, 13 mamyr kúni keshqurym polıtsııaǵa 17 jastaǵy jasóspirim men onyń bastaýysh synypta oqıtyn jıen inisiniń joǵalǵany týraly habar túsken. Bul týraly habarlama birden áleýmettik jelilerde jarııalanyp, baǵyt-baǵdar Petropavl qalalyq Polıtsııa basqarmasynyń barlyq jeke quramyna taratyldy. Іzdestirý is-sharalaryna 14 avtopatrýlmen 90 astam polıtsııa qyzmetkeri, 20 astam erikti, qalalyq bilim berý bóliminiń, mektep ákimshiliginiń, áleýmettik-psıhologııalyq qyzmettiń ókilderi qatysty. Balalar júrýi múmkin «Bereke» yqsham aýdany men Jumysshy kenti, vokzal mańy, mádenıet jáne demalys saıabaǵy, Jeńis saıabaǵy, orman alqaptary, saıajaı qoǵamdastyqtary tekserildi.
14 mamyr kúni tańerteń saıajaı qoǵamdastyqtarynyń biriniń kúzetshisi qaraýsyz qalǵan ýchaskede kámeletke tolmaǵandardy kórgeni jaıly aıtyp, polıtsııa qyzmetkerine habarlasty. Tańǵy saǵat 6.00-da izdestirý toby shyǵyp, qaraýsyz qalǵan úılerdiń birinen eki balany tapty.
Balalardyń aıtýynsha, olar sýǵa shomylmaq bolyp úıden shyqqan. Biraq naızaǵaı oınap, jaýyn jaýyp ketkendikten bos turǵan úıge túnemek bolypty. Polıtseıler tabylǵan balalardy ata-analaryna tabys etti. Oqıǵanyń mán-jaıy anyqtalýda.
«Ata-analar jasóspirimderdiń jaýapsyzdyǵynan balalarynyń joǵalǵany týraly ótinishpen polıtsııaǵa júginip jatady. Kóp jaǵdaıda balalardy kezekshi táýlikte izdep tabamyz. Kóbine olar tanys-dostarymen ýaqyt ótkizip, ol jaıly jaqyndaryna habarlaspaıdy», - deıdi Petropavl qalalyq PB ıývenaldyq polıtsııa bólimshesiniń bastyǵy Elmıra Abýsheva.
