Petropavlda joǵalǵan boıjetken eki kúnnen keıin tabyldy
PETROPAVL. QazAqparat – Petropavlda habarsyz ketken 18 jastaǵy qyzdy izdestirýge volonterler jumyldyryldy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, qyzynyń joǵalyp ketkendigi týraly Petropavl qalasynyń turǵyny 24 naýryz kúni aryz bergen. Anasy qyzynyń kúndizgi saǵat 12.00 shamasynda eshkimdi eskertpeı shyǵyp ketkenin aıtqan. Byltyr jazda Tarazdan Petropavlǵa qonys aýdarǵandaryn jetkizgen áıeldiń sózinshe, qyzy qalany durys bilmeıdi.
Іz-túzsiz ketken qyzdy tabýǵa polıtsııanyń birneshe basqarmasynyń mamandary jumyldyryldy. Olarǵa bul joly da Lider.kz volonterler qozǵalysy kómekke keldi. Atqarylǵan jumystardyń nátıjesinde joǵalǵan boıjetken 26 naýryz kúni saǵat 12.30 shamasynda aman-esen tabyldy. Ol eki kún boıy Petropavldyń ortalyq aýmaǵynda turatyn tanystarynyń úıinde bolypty. Polıtseıler ony Ekinshi qalalyq polıtsııa bólimine jetkizip, anasyna tabys etti.
SQO PD Krımınaldy polıtsııa basqarmasy mamandarynyń málimetinshe, jyl basynan polıtsııaǵa habarsyz ketkender jaıynda 38 aryz túsken. Olardyń barlyǵy tabyldy.
