Petropavlda joǵalǵan bala pesh ishinen tabyldy
PETROPAVL. KAZINFORM — Petropavlda tańerteń úıinen shyǵyp ketip, keshke deıin habarsyz bolǵan 13 jastaǵy oqýshyny izdeýge birneshe polıtsııa qyzmeti, úsh dron jumyldyryldy.
Soltústik Qazaqstan oblystyq polıtsııa departamenti baspasóz qyzmetiniń málimetinshe, oqıǵa 10 qarashada Jumysshy kentinde bolǵan. Saǵat 17:30 shamasynda «102» arnasyna Petropavl turǵyny habarlasyp, tańerteń úıinen shyǵyp ketken 13 jastaǵy ulyn taba almaı jatqanyn aıtqan. Balanyń ózimen birge uıaly telefony bolmaǵan.
Polıtseıler habar túsken boıda izdeý jumystaryna kirisken. Patrýlde júrgen polıtsııanyń keshendi kúshteri jumyldyrylyp, arnaıy jedel áreket etý jasaǵynyń qyzmetkerleri de izdeýge qosyldy.
Sondaı-aq, Jumysshy kentiniń mańaıyn tekserý úshin aspanǵa úsh dron kóterilgen. Al jedel basqarý ortalyǵynyń ınspektorlary beınebaqylaý kameralaryndaǵy jazbalardy tekserdi.
Nátıjesinde jasóspirimniń júrgen baǵyty anyqtalyp, onyń Zaıtsev kóshesine qaraı ketkeni belgili boldy.
Kóp uzamaı oqýshy úılerdiń biriniń janynda ornatylǵan sándik peshtiń ishinen tabyldy. Polıtseılerdiń aıtýynsha, bala sol jerde jylynbaqshy bolyp, uıyqtap ketken.
Tártip saqshylary ony aman-esen úıine jetkizdi.
Ata-anasynyń aıtýynsha, jasóspirim buǵan deıin úıinen ketip kórmegen. Onyń bul joly ne sebepti úıden bezgenin kámeletke tolmaǵandar isteri jónindegi polıtsııa qyzmetkerleri anyqtaıdy. Qazirgi ýaqytta polıtsııa qyzmetkerleri ata-anamen jáne balamen túsindirý jumystaryn júrgizdi.
Buǵan deıin Almatyda oqýshylary jappaı ýlanǵannan keıin respýblıkalyq fızıka-matematıka mektebiniń Almaty fılıalynyń dırektory aýysqanyn jazǵan edik.
