Petropavlda joǵalǵan aǵaly-inili eki búldirshin tabyldy
PETROPAVL. QazAqparat – Petropavlda mektepten ózdiginen shyǵyp ketip, adasqan eki búldirshin aman-esen tabyldy, dep habarlaıdy QazAqparat tilshisi.
Soltústik Qazaqstan oblysy Polıtsııa departamenti baspasóz qyzmetiniń málimetinshe, Petropavl qalasynyń turǵyny «102» nómirine habarlasyp, eki ulynyń joǵalǵanyn aıtqan. 6 jáne 7 jastaǵy eki búldirshin analarynyń kelýin kútpeı, mektepten shyǵyp ketken. Balalaryn izdep sharq urǵan ana ózdiginen taba almaǵandyqtan polıtseılerden kómek surapty.
Joǵalǵan balalardy izdeýge polıtseılerden basqa oqýshylardyń muǵalimi de attandy. Kóp uzamaı búldirshinder jeke sektordan tabyldy.
«Balalar qorqyp qalypty, jylaǵan. Analaryn kórgende qýanyshtarynda shek bolmady. Barlyǵy jaqsy aıaqtaldy», - deıdi Petropavl qalalyq polıtsııa basqarmasynyń PPB ınspektory Shymbolat Ýaısov.
Polıtseılerdiń aıtýynsha, osyǵan uqsas oqıǵalar jıi bolyp turady. Qazan aıynda oblys ortalyǵynda 8 jasar qyz joǵaldy. Tańerteń dúkenge shyqqan ol qaıtyp oralmaǵan.
Baldyrǵandy izdeýge polıtseıler men volonterler jumyldyrylyp, birer saǵattan keıin ol oınap júrgen jerinen tabyldy.
«Balalar dostaryna oınaýǵa ketip, qyzyǵyna túskeni sondaı ata-analaryna telefon shalýǵa umytady. Bıylǵy oqý jylynan bastap biz joǵalǵan 25 balany izdedik. Olar negizinen jasóspirimder. Barlyǵy bir táýliktiń ishinde tabylyp, úılerine qaıtaryldy», - deıdi krımınaldyq polıtsııa qyzmetkerleri.
