Petropavlda joǵalǵan 12 jasar bala aman tabyldy
PETROPAVL. QazAqparat – Petropavlda polıtseıler 12 jastaǵy joǵalǵan balany aman-esen tapty, dep habarlaıdy QazAqparat tilshisi.
Soltústik Qazaqstan oblysy polıtsııa departamenti baspasóz qyzmetiniń málimetinshe, 4 aqpan kúni Petropavl turǵyny saǵat 17.00 shamasynda polıtsııaǵa habarlasyp, balasynyń joǵalǵanyn aıtqan. 12 jastaǵy er bala úıindegilerdi eskertpeı shyǵyp ketken.
Balanyń belgileri Petropavl qalalyq basqarmasynyń barlyq jeke quramyna taratyldy. Jasóspirimdi izdestirýge ıývenaldy ınspektorlar, ýchaskelik ınspektorlar, tergeýshiler men patrýldi polıtseıler jumyldyryldy. Balanyń joǵalǵandyǵy jaıynda aqparatty volonterler áleýmettik jelilerge, tanymal pablıkterge ornalastyrdy.
Joǵalǵan balany polıtseıler eki saǵat shamasynda aman-esen taýyp, anasyna tabystady. Jasóspirim tanystarynyń úıinde bolǵan eken.
«Polıtseıler men volonterler joǵalǵan adamdy tez arada izdep tabýda tıimdi tetik qalyptastyrǵan. Áleýmettik jelige habarlandyrý ornalastyryp, aqparattyq qoldaý kórsetý – polıtsııa jumysyn birshama jeńildetedi. Sondaı-aq volonterler izdeý jumystaryna da qatysady. Alaıda, bıyldyqqa olardyń kómegine júgingenimiz joq. Jyl basynan ata-analardan balalarynyń joǵalǵandyǵy jóninde 9 habarlama tústi. Olardyń barlyǵynda polıtseıler jasóspirimderdiń júrgen jerin qysqa merzimde anyqtap, ata-analaryna tapsyrdy», - deıdi Petropavl qalalyq polıtsııa basqarmasynyń bastyǵy Jandos Muqatov.
