Petropavlda joǵalǵan 11 jasar qyz aman-esen tabyldy
PETROPAVL. QazAqparat – Petropavlda 11 jasar qyzdyń habarsyz ketýine úıdegi janjal sebep bolǵan, dep habarlaıdy QazAqparat tilshisi.
Ótken demalys kúnderi Petropavldyń áleýmettik jelilerinde 11 jasar qyzdyń joǵalǵany jaıly habarlama tarap ketti.
Soltústik Qazaqstan oblysy polıtsııa departamenti baspasóz qyzmetiniń málimetinshe, jasóspirim senbi kúni keshki 21.00-ge deıin úıine kelmegen. Anasy birden polıtsııaǵa júgingen. Іzdeýge barlyq qyzmet jumyldyryldy. ıÝvenaldyq jáne patrýldik polıtsııa, jedel qyzmetkerler men ýchaskelik ınspektorlar, sonymen qatar 100-den asa volonter qalanyń burysh-buryshyn sharlady. Іzdeý jumystary túnimen júrgizildi.
Kelesi kúni qyzdy jáne onyń kámelet jasyna tolǵan aǵasyn patrýldik polıtsııa batalonynyń qyzmetkeri mádenıet jáne demalys parkinen tapty.
Jasóspirimniń janjalǵa baılanysty úıinen ketip qalǵany belgili boldy. Telefonyn óshirip, qurbysynyń úıinde túnep shyqqan. 11 jasar qyz aman-esen úıine qaıtaryldy, polıtseıler onymen jáne ata-anasymen profılaktıkalyq sıpattaǵy áńgime júrgizdi.
«Jasóspirimder jaqyndarymen ursysyp, keıde ózderin «eresek» retinde kórsetý úshin úılerinen ketip qalyp jatady. Eger sizdiń úıińizde balańyzdyń dosy nemese tanysy qonyp qalsa, mindetti túrde onyń ata-anasymen habarlasýlaryńyzdy suraımyz. Kóp jaǵdaıda ata-ana qyzy nemese ulynyń qaıda ekendigin bilmeı, izdeý salyp jatady. Kámeletke tolmaǵan balanyń joǵalǵany - tótenshe jaǵdaı bolyp esepteledi. Іzdeý jumystaryna qyzmetkerlerden bólek volonterler tartylady. Jasóspirimder úıden habarsyz ketýdiń saldarynan ata-anasynyń ákimshilik sıpattaǵy jazaǵa tartylatynyn, oqıǵanyń kámeletke tolmaǵandar isi jónindegi komıssııaǵa deıin jetetinin oılamaıdy» , - deıdi Petropavl qalasy polıtsııa basqarmasy jergilikti polıtsııa qyzmeti bólimi ıývenaldyq polıtsııa bólimshesiniń bastyǵy Elmıra Abýsheva.
Jyl basynan beri oblys ortalyǵynda polıtseıler iz-túzsiz joǵalǵan jasóspirimder týraly 16 habarlama aldy. Balalardyń bári bir táýlik ishinde tabyldy.
