Petropavlda jilikti qolmen syndyrýdan jarys ótti

PETROPAVL. KAZINFORM – Naýryz meıramyna oraı Petropavldaǵy mektepterdiń birinde jilik syndyrýdan alǵash ret ata-analar men oqýshylar, ustazdar arasynda jarys ótti.

Jarysty Petropavl qalasynyń Nazarbaev Zııatkerlik mektebi uıymdastyrdy. Oǵan 50 shaqty adam qatysyp, eptilik pen bilektiń kúshin synady. 

- Jilik syndyrýdan jarys ótedi degennen keıin kelip qaldyq. Kerek is-shara dep oılaımyn. Balalarymyz salt-dástúrdi bilip ósýi qajet. Búgin qoldy aýyrtyp almas úshin oramaldy qalaı oraý kerek, qalaı urý jaıly, aıtyp, kórsettik. Ózimiz de keremet áser aldyq. Syndyrmasaq ta, qatystyq. Dástúr umyt qalǵan joq, qysta soǵym etin asyp, toı-tomalaq ótkizgende jigitter jaǵy jilik syndyryp, kúshin synap jatady, - deıdi oqýshynyń ákesi Asyl Qazbekov. 

Uıymdastyrýshylardyń aıtýynsha, jilik syndyrý - qazaqtyń kóne oıyndarynyń biri. Onyń máni - toıdan qalǵan jilik súıegin qolmen jaryp, syndyrý. Bul oıyn kúsh, tózimdilik jáne durys tehnıkany qajet etedi. Ejelgi ýaqytta jilik syndyrý tek oıyn-saýyq qana emes, sonymen qatar bozbalalardyń kúshi men eptiligin kórip, eresek ómirge daıyndyǵyn tekserý tásili bolǵan.

- Buryn kishkentaı kezimde ákemniń dostary kelip osylaısha jilik syndyryp oınaıtyn. Men de óz kúshimdi synap kórmek boldym. Bul oıynda birinshi bolyp urǵandarǵa qıyn, al meniń jolym boldy, sońyna qaraı urǵandyqtan tez syndy dep oılaımyn, - deıdi mektep oqýshysy Alıhan Gýseınov. 

Jarys barysynda qatysýshylar barlyǵy 4 jilikti syndyryp, myqtylardy anyqtady. Mektep ujymy bul is-sharany dástúrge aınaldyrýdy josparlap otyr.

Buǵan deıin Petropavl qalasynyń kireberisine Botaıǵa arnalǵan monýment ornatylatynyn jazǵan edik.