Petropavlda jıhaz jasaıtyn tseh ashyp alǵan turǵyn úıden órt shyqty
PETROPAVL. QazAqparat – Petropavldaǵy Jumysshy kentinde bir qabatty úı órtenip, mamandar ǵımarattyń ishinen 3 gaz ballonyn shyǵardy, dep habarlaıdy QazAqparat tilshisi.
SQO Tótenshe jaǵdaılar basqarmasy baspasóz qyzmetiniń málimetinshe, Petropavldaǵy Jumysshy kentinde ornalasqan Sývorov, 256 mekenjaıyndaǵy úıdiń otqa oranǵandyǵy jóninde habar 101 nómirine tańǵy saǵat 07.07-de túsken.
Mamandar oqıǵa ornyna jetkende ot bir qabatty úıdiń kireberisi men shatyryn sharpyp úlgergen eken. Eki órt sóndirý bóliminiń 12 qyzmetkeri 3 tehnıkanyń kómegimen jalyndy shamamen bir saǵattyń ishinde tolyq aýyzdyqtady. Úıden 3 gaz ballony shyǵarylǵan.
Órttiń saldarynan úıge aıtarlyqtaı zııan keldi. Ǵımarattyń 30 sharshy metr shatyry jáne kireberis veranda janyp ketti. Dúnıe-múlik te zaqymdandy.
Mamandardyń aıtýynsha, úı jalǵa berilip, ol jıhaz tsehy retinde paıdalanylyp kelgen. Qazir úı ıesi anyqtalyp jatyr. Órttiń shyǵý sebebi men kelgen shyǵyn mólsheri ázirshe, belgisiz.
Jalpy jyl basynan Petropavldaǵy Jumysshy kentinde ǵana toǵyz órt tirkelip, 3 adam qaza bolǵan.
