Petropavlda jeti balanyń anasy ákimnen kómek surady
Aımaq basshysyna Petropavl turǵyny, 7 balanyń anasy Tatıana Pıpýs kómek surap keldi. Kópbalaly ana óte qıyn jaǵdaıda turyp jatqanyn aıtty. Óıtkeni, búginde Pıpýs áýletiniń úıi qıraýdyń az-aq aldynda tur.
«Úı apattyq jaǵdaıda. Biz úıge kezekte turmyz. Sáýir aıynda sý astynda qalǵanbyz. Biraq ornyna eshteńe usynbady. Qalalyq ákimdik aýmaǵy 8 sharshy metrlik jataqhana bólmesin usynǵan. Balalardyń bireýi sabaǵyn úıden oqıdy. Biraq muǵalimder úıimizge kelgisi kelmeıdi, óıtkeni úıdiń shatyry qulaıyn dep tur. Balalar jıi aýyrady. Bizge jańa baspana kerek emes», - dedi Tatıana Pıpýs.
Áıeldiń aıtýynsha, buryn olarǵa jataqhanadan bólme berilgen. Olar ony jekeshelendirip, satqan, sóıtip jeke úı satyp alǵan. Pıpýstyń aıtýynsha, úıdi satqan adam olardy aldap, úıdiń qıraıyn dep turǵanyn aıtpaǵan.
Tatıananyń jubaıy vahtalyq ádispen Reseıde jumys isteıdi. Biraq qazir otbasyn ýaıymdap, jumysyna bara almaı otyr. Kópbalaly ananyń sózinshe, olar páter jaldaýǵa da tyrysqan, alaıda 7 balasy bar ekenin estigen úı ıeleri birden bas tartady eken.
Otbasy úı kezeginde tur. Petropavl ákimi Bolat Jumabekov Pıpýs otbasynyń kezek nómiri 3058 ekenin aıtty. Degenmen, Qumar Aqsaqalov kópbalaly otbasy jaldamaly baspanaǵa qol jetkizgenshe olardyń máselesin sheship berýge ýáde etti. Ol Pıpýs áýletine qonaq úı túrindegi páterge kóshýdi usyndy.
«Ázirge ýaqytsha tura turasyzdar. Bıyl biz Petropaldaǵy kópbalaly otbasylardyń 30 paıyzyn jaldamaly úımen qamtamasyz etemiz. Ol úshin arnaıy qarjy bólinedi», - dedi óńir basshysy.
