Petropavlda jergilikti aýqymdaǵy tótenshe jaǵdaı jarııalandy
PETROPAVL. KAZINFORM – Petropavlda jergilikti aýqymdaǵy tabıǵı sıpattaǵy tótenshe jaǵdaı jarııalandy. Qala ákimi Serik Muhamedıevtiń qoly qoıylǵan qaýly jobasy ashyq normatıvtik-quqyqtyq aktilerdiń saıtynda shyqty.
Qujatta Petropavl qalasyndaǵy tótenshe jaǵdaılardyń aldyn alý jáne joıý jónindegi komıssııanyń kezekten tys otyrysynyń hattamasy negizinde sheshim qabyldanǵany kórsetilgen.
«Petropavl qalasy ákiminiń «Petropavl qalasynda jergilikti aýqymdaǵy tabıǵı sıpattaǵy tótenshe jaǵdaı jarııalaý týraly» sheshimi Abaı kóshesindegi káriz kollektorynyń isten shyǵý saldaryn joıý, sondaı-aq jeke sektordy sý basý saldaryn joıý maqsatynda qabyldanady. Zańnamany engiziletin normatıvtik quqyqtyq aktiniń jobasyna sáıkes keltirý: qalalyq káriz júıesiniń jumys isteýin qamtamasyz etý jáne qalanyń ekologııalyq qaýipsizdigin qamtamasyz etý, sý basqan qurylystardy qalpyna keltirý qajettiginen týǵan», — delingen jobada.
Petropavldaǵy Abaı kóshesinde dıametri 800 mm káriz kollektory 30 naýryzǵa qaraǵan túni isten shyǵyp, joldyń bir bóligi opyrylǵan bolatyn.
Buǵan deıin Petropavlda Jýkov kóshesindegi kollektor buzylǵan kezde osyndaı tótenshe jaǵdaı jarııalandy. Serik Muhamedıev osylaısha kollektorǵa jedel jóndeý júrgizý múmkin bolatynyn aıtqan edi.
