Petropavlda jergilikti aýqymdaǵy tehnogendik sıpattaǵy tótenshe jaǵdaı jarııalandy
PETROPAVL. QazAqparat – Petropavlda 2-jylý-elektr ortalyǵyndaǵy apatqa baılanysty jergilikti aýqymdaǵy tehnogendik sıpattaǵy tótenshe jaǵdaı jarııalaý týraly sheshim qabyldandy, dep habarlaıdy QazAqparat tilshisi.
Resmı qujattyń jobasy Ashyq normatıvtik quqyqtyq aktilerdiń ınternet-portalyna jarııalandy.
Sheshim qabyldaýǵa Petropavl qalasy ákimdiginiń janyndaǵy tótenshe jaǵdaılardyń aldyn alý jáne joıý jónindegi komıssııa otyrysynyń 4 shildedegi № 7 hattamasy negiz bolǵan.
«Qazaqstan Respýblıkasyndaǵy jergilikti memlekettik basqarý jáne ózin-ózi basqarý týraly» QR-nyń 2001 jylǵy 23 qańtardaǵy Zańynyń 33-baby 1-tarmaǵy 13) tarmaqshasyna, «Azamattyq qorǵanys týraly» QR-synyń 2014 jylǵy 11 sáýirdegi Zańynyń 48 jáne 50-baptaryna, «Tabıǵı jáne tehnogendik sıpattaǵy tótenshe jaǵdaılardyń synyptamasyn belgileý týraly» QR-sy Úkimetiniń 2014 jylǵy 02 shildedegi № 756 qaýlysyna sáıkes Petropavldaǵy 2-JEO apatqa baılanysty jergilikti aýqymdaǵy tehnogendik sıpattaǵy tótenshe jaǵdaı jarııalansyn», - delingen qujatta.
Tehnogendik sıpattaǵy tótenshe jaǵdaıdy joıýǵa Petropavl qalasy ákiminiń mindetin atqarýshy Janbolat Batyrbekov basshylyq etpek.
Bul sheshim ony alǵashqy resmı jarııalaǵan kúninen bastap qoldanysqa engiziledi.
Esterińizge salaıyq, 20 naýryzda Petropavldaǵy jylý-elektr ortalyǵynyń tútin murjasy jartylaı opyrylyp qulaǵan edi. Saldarynan jumysshy áıel mert boldy.
Al oblys ortalyǵynda turǵyndar páterleriniń sýyp ketkenine shaǵymdandy.
Keıin osy kásiporynnyń birneshe basshysy qamaýǵa alynyp, qylmystyq is qozǵaldy.
SQO ákimi ortalyqtyń jartylaı qulaǵan murjasy tolyq buzylyp alynatynyn aıtty.
Sondaı-aq, Energetıka mınıstri Bolat Aqsholaqov Petropavldaǵy murjasy qulaǵan 2-JEO-da bolyp, nysandy kúrdeli jóndeýge 17,5 mlrd teńge qajet ekenin aıtty.
Al, jýyrda «Sevkazenergo» AQ tútin murjasyn bólshekteýge nege úsh adamnyń ǵana jumyldyrylǵanyna túsinik berdi.
