Petropavlda jer ýchaskesin jalǵa alý quqyǵy aýktsıonnan satyldy
PETROPAVL. QazAqparat - Petropavl qalalyq ákimdigi jer ýchaskesin jalǵa alý quqyǵyn aýktsıonnan satty, dep habarlaıdy QazAqparat tilshisi.
SQO Kásipkerler palatasy baspasóz qyzmetiniń málimetinshe, bul - jer ýchaskesin jalǵa alý quqyǵyn satqan bıyldyqqa alǵashqy aýktsıon. Jıyrma lot qoıylsa, sonyń 14-i satylǵan.
Aǵylshyn ádisimen ótken aýktsıonǵa zańdy tulǵalarmen qatar jeke tulǵalar da qatysýǵa múmindik aldy. Barlyǵy 36 qatysýshydan ótinish túsken. Aýktsıonnyń barysyn oblystyq kásipkerler palatasynyń ókilderi baqylady.
«Kásipkerler palatasyna túsetin ótinishterdi saralaı kele jer qatynasyna baılanysty suraqtardyń asa mańyzdy ekenin bildik. Aýktsıon ótkizý arqyly máseleni ońtaıly sheshýge bolady. Jer ýchaskeleri kásipkerlerge ashyq túrde beriledi», - deıdi SQO Kásipkerler palatasy dırektorynyń orynbasary Jeńis Qazıev.
Aýmaǵy ártúrli 20 ýchaskeni tek kommertsııalyq maqsatta ǵana qoldanýǵa bolady. 5 jylǵa jalǵa beriletin bul jerler qalanyń ár aýdanynda ornalasqan.
«Aýmaǵy 0,1 ga jer ýchaskesi qalanyń ortalyǵynda ornalasqan. Bul lottyń bastapqy baǵasy 174,6 myń teńge bolsa, 3 mln teńgege satyldy. Bul - osyndaı baǵaǵa satylǵan eń qymbat lot boldy. Qatysýshylar jer ýchaskesin jalǵa alý quqyǵyna ıe bolý úshin qyzý tartysty», - deıdi Jeńis Qazıev.
Petropavl qalalyq ákimdiginiń málimetinshe, jer qatynastary bólimi jer ýchaskelerin jalǵa alý quqyǵyn 5 jylǵa satty. 20 nysan saýdaǵa shyǵarylsa, sonyń 14-ine suranys boldy. Olardyń jalpy aýmaǵy - 2,0739 ga, baǵasy - 8,5 mln teńge.
