Petropavlda Jeńis saıabaǵy saltanatty túrde ashyldy

ETROPAVL. Mamyrdyń 7-i. QazAqparat /Sergeı Kýznetsov/ - Búgin Petropavlda Otan qorǵaýshylar kúni jáne Jeńistiń 65 jyldyǵy qarsańynda jańartylǵan Jeńis saıabaǵynyń saltanatty túrde ashylýy boldy. Saltanatty sharaǵa soǵys ardagerleri men tyl eńbekkerleri, qalanyń qurmetti turǵyndary, Petropavl áskerı gornızonynyń, eńbek ujymdarynyń, jastar uıymdarynyń ókilderi qatysty.

Oblys ákimi Serik Bilálov óz sózinde fashızmdi jeńgen Jeńis kúniniń uly tarıhı mańyzyn, Otan táýelsizdigi men erkindik úshin shaıqasqan keńes jaýyngerleriniń batyrlyǵy men erligin atap ótti.

Aımaq basshysy búgingi tańda saıabaqta 200 qaıyń, shyrsha, qaraǵaı kóshetteriniń otyrǵyzylǵanyna, sáýlettik ǵımarattardy, Uly Otan soǵysyn keıipteıtin tarıhı-jaýyngerlik kompozıtsııalardy abattandyrý men jańartý jumystary júrgizilgendigine toqtaldy.

Oblys ákimi oblystaǵy kásiporyndar men uıymdardan, azamattar atynan saıabaqtyń jańartylý jumystaryna 23 mıllıon teńge bólingenin atap ótip, shette qalmaı, kómekteskenderdiń barlyǵyna alǵysyn bildirdi.

Bunymen Jeńis saıabaǵynyń jańartylýy men qurylysy aıaqtalǵan joq. Aldaǵy ýaqytta attraktsıondar men sporttyq, oıyn alańdaryn salyp, abattandyrý men kógaldandyrý jumystaryn júrgizý josparlanǵan.

Saltanatty ashylý sharasynda Uly Otan soǵysynyń ardageri Petr Fılıppenko, QR ІІM ІÁ Petropavl áskerı ınstıtýty kafedrasynyń bastyǵy, polkovnık Bolat Qojahmetov, oblys ortalyǵynyń burynǵy, basshysy, Petropavl qalasynyń qurmetti azamaty Aleksandr Lıpovoı, «Jas Otan» jastar qanatynyń atqarýshy hatshysy Danııar Ábýtálipov sóz sóılep, oblys jáne qala turǵyndarynyń qorǵanys salasy men basqa da kásiporyndarynda qyzmet ete júrip, Jeńiske qosqan úlesterin atap ótti.

Eskertkishke gúldesteler men gúl shoqtaryn qoıǵan soń oblys ákimi ardagerlerdi kıiz úılerdegi merekelik dastarhanǵa shaqyrdy, al tilek bildirýshiler maıdan ashanasynda daıyndalǵan jaýynger botqasynan dám tatty. Saltanatty shara barysynda áskerı ınstıtýttyń orkestri men ánshileri soǵys jyldaryndaǵy týyndylardy oryndady.