Petropavlda jeńil kólik pen traktor soqtyǵysyp, bir adam mert boldy
PETROPAVL. QazAqparat – Petropavl syrtyndaǵy aınalma jolda jeńil kólik pen júk tıegishi bar traktor soqtyǵysyp, mashına júrgizýshisi oqıǵa ornynda kóz jumdy, dep habarlaıdy QazAqparat tilshisi.
Soltústik Qazaqstan oblysy polıtsııa departamenti baspasóz qyzmetiniń málimetinshe, 13 aqpan kúni saǵat 10.00 shamasynda Petropavl qalasy polıtsııa basqarmasyna «Barmaleı» meıramhanasy men «Teplyı kanal» arasyndaǵy aınalma jolda VAZ-2114 avtokóligi men júk tıegishi bar SEM traktorynyń soqtyǵysqany týraly habarlama kelip tústi.
Jol-kólik oqıǵasy saldarynan jeńil kóliktiń 1984 jyly týǵan júrgizýshisi oqıǵa ornynda kóz jumdy.
Bul fakti QR Qylmystyq kodeksiniń 345-baby 3-bóligi «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy» boıynsha Sotqa deıingi tergep-tekserýdiń biryńǵaı tizilimine engizildi.
Sotqa deıingi tergeý aıasynda polıtseıler jol-kólik oqıǵasynyń mán-jaıy men sebepterin anyqtaýy qajet. Birqatar qajetti saraptamalar taǵaıyndaldy.
SQO joldarynda qańtar aıynda 15 jol-kólik oqıǵasy tirkelip, saldarynan 6 adam qaza taýyp, 20 adam jaraqattandy. Polıtsııa qyzmetkerleri jol qozǵalysynyń barlyq qatysýshylaryn Jol júrisi qaǵıdalaryn qatań saqtaýǵa shaqyrady.
