Petropavlda jeńil kólik otqa orandy
PETROPAVL. QazAqparat – Petropavl qalasynyń kósheleriniń birinde búgin tańerteń avtokólik janyp ketti, dep habarlaıdy QazAqparat tilshisi.
Soltústik Qazaqstan oblystyq Tótenshe jaǵdaılar departamenti baspasóz qyzmetiniń habarlaýynsha, oqys oqıǵa jaıynda habar «101» telefon nómirine saǵat 9.05 mınýt ketkende túsken. Petropavldaǵy M.Áýezov pen Indýstrıalnyı kósheleriniń qıylysynda ÝAZ 349 markili jeńil kólikten órt shyǵypty.
№2 jáne №4 órt sóndirý bólimderiniń mamandary jetken kezde avtokólik tutas otqa oranǵan eken. Órt sóndirýshiler jarty saǵattyń ishinde tilsiz jaýdy tolyq aýyzdyqtady. Avtokólik janyp ketti. Zardap shekkender joq.
Mamandardyń boljamynsha, órttiń shyǵýyna janarmaı jabdyǵynyń isten shyǵýy sebep bolýy múmkin.
SQO Tótenshe jaǵdaılar departamenti oqys jaǵdaılardyń aldyn alý úshin únemi avtokóliktiń tehnıkalyq jaǵdaıyna, ásirese elektr jabdyqtarynyń jaǵdaıyna mán berip, teksertip otyrý qajettigin eskertedi.
Avtokólikterdiń órtenýine negizinen elektr symdarynyń qysqa tuıyqtalýy men janarmaı jabdyǵynyń isten shyǵýy sebep.
Mamandardyń sózine qaraǵanda, avtokóliktiń tolyq janyp ketýine nebary 5-8 mınýt jetkilikti eken.
