Petropavlda jeńil kólik órtenip, ishindegi gaz ballony jaryldy
PETROPAVL. QazAqparat – Petropavlda jeńil kólik órtenip, saldarynan ishindegi gaz qondyrǵysy jaryldy, zardap shekkender joq, dep habarlaıdy QazAqparat tilshisi.
Soltústik Qazaqstan oblysy tótenshe jaǵdaılar departamenti baspasóz qyzmetiniń málimetinshe, búgin tańǵy saǵat 7.26-da 101 telefon nómirine Petropavldaǵy Chaıkovskıı kóshesi, 4 mekenjaıy boıynsha Aýdı kóliginiń janyp jatqandyǵy týraly habar túsken. Órt sóndirýshiler jedel jetkenimen, olar kelgenshe gaz qondyrǵysy bar kólikte jarylys boldy. Qaza tapqandar men zardap shekkender joq.
Órt sóndirýshiler jalyndy 10 mınýtta aýyzdyqtady, alaıda kólik tolyǵymen janyp ketti. Aldyn ala boljam boıynsha, órt elektr symdarynyń qysqa tuıyqtalýynan shyǵýy múmkin.
«Avtokólikterdiń elektr qondyrǵylaryn ýaqtyly teksertip turýǵa keńes beremiz. Óıtkeni mashınalarda órt negizinen symdardyń qysqa tuıyqtalýynan shyǵyp jatady. Jalyn kúsh alǵan jaǵdaıda jeńil kólik 5-7 mınýttyń ishinde tolyq janyp ketedi», - deıdi mamandar.
