Petropavlda jeńil kólik eki adamdy qaǵyp ketti
PETROPAVL. QazAqparat – Petropavlda jeńil kólik jolaýshylar jolaǵymen ótpek bolǵan eki adamdy soqty, dep habarlaıdy QazAqparat tilshisi.⠀⠀
Soltústik Qazaqstan oblysy polıtsııa departamenti baspasóz qyzmetiniń málimetinshe, jol-kólik oqıǵasy Petropavldaǵy Qızatov kóshesiniń boıynda bolǵan. «Audi B3» avtokóliginiń 44 jastaǵy júrgizýshisi «Volkswagen Passat» kóligimen soqtyǵysyp, rýlge ıe bola almaı qalǵan. Saldarynan jolaýshylar jolaǵymen ótip bara jatqan eki adamdy qaǵyp ketti.
Zardap shekkender aman, alaıda olarǵa medıtsınalyq kómek qajet boldy. Jedel járdem qyzmeti birden qaladaǵy emdeý mekemesine jetkizdi. Dıagnoz qoıylǵannan keıin jigitterdiń biri úıine jiberildi, ekinshi er adam aýrýhanaǵa jatqyzyldy. ⠀⠀
Medıtsınalyq saraptama eki kólik júrgizýshisiniń de spırttik ishimdik ishpegenin kórsetti.
Jol-kólik oqıǵasyna qatysty materıal jınaldy jáne istiń mán-jaıyn anyqtap, protsessýaldyq sheshim shyǵarý úshin Petropavl qalalyq polıtsııa basqarmasynyń ákimshilik polıtsııa bólimine jiberildi.
Buǵan deıin Almaty-Óskemen tas jolynda kólik aýdarylyp, úsh adamnyń mert bolǵanyn habarlaǵan edik. Qaza tapqan 12 jastaǵy qyz oqıǵa ornynda jan tapsyrsa, kólik júrgizýshisi men bir jasar sábı aýrýhanada kóz jumdy.
