Petropavlda jeńil kólik adamdar turǵan aıaldamaǵa soǵyldy: zardap shekkender bar

PETROPAVL. QazAqparat – Petropavlda tús ýaqytynda jeńil kólik avtobýs aıaldamasyna soǵylyp, bes adam jaraqat aldy. Soltústik Qazaqstan oblystyq densaýlyq saqtaý basqarmasynyń málimetinshe, zardap shekkenderdiń bireýiniń jaǵdaıy aýyr, dep habarlaıdy QazAqparat tilshisi.

Petropavlda bolǵan jol apatynyń beınejazbasy áleýmettik jelide tarady. Kýágerlerdiń aıtýynsha, jeńil kólik adamdar turǵan avtobýs aıaldamasyn soqqan. Oqıǵa ornyna birneshe jedel járdem kóligi kelip, zardap shekkenderdi emdeý mekemelerine jetkizdi.

SQO densaýlyq saqtaý basqarmasy baspasóz qyzmetiniń málimetinshe, Petropavldaǵy jedel járdem qyzmetine shaqyrtý saǵat 13.39-da túsken. Mamandar úsh mınýt ishinde apat ornyna jetti.

«Eki adam jeńil jaraqat aldy. Olar alǵashqy medıtsınalyq kómekten bas tartty. Al úsh adam qalalyq aýrýhanalarǵa jetkizildi.

Birinshi áıeldiń mıy soǵylǵan, bas súıegi synǵan, jaǵdaıy aýyr, kóp beıindi oblystyq aýrýhanaǵa jetkizildi.

Ekinshi áıel kóp beıindi qalalyq aýrýhanaǵa aparyldy, onyń jilinshigi synǵan, jaǵdaıy ortansha. Zardap shekkenderdiń úshinshisi er adam, jabyq bas-mı jaraqatyn aldy», - delingen basqarmanyń baspasóz qyzmeti taratqan habarlamada.