Petropavlda jeke turǵyn úıden urlanǵan temir-tersek metall qabyldaý ornynan tabyldy
PETROPAVL. QazAqparat – Petropavlda tústi jáne qara metalldyń, temir qaldyqtarynyń zańsyz aınalymyna qatysty qylmystardy anyqtaý maqsatynda polıtseıler reıd ótkizdi, dep habarlaıdy QazAqparat tilshisi.
Soltústik Qazaqstan oblysy Polıtsııa departamenti baspasóz qyzmetiniń málimetinshe, Petropavlda metall qabyldaıtyn 38 oryn bar. Tártip saqshylary olardyń barlyǵyn nazarda ustap otyrady.
Polıtseılerdiń aıtýynsha, metall qabyldaý ornynyń qyzmetkerleri tapsyrylǵan temir buıym kúdik týdyrǵan jaǵdaıda tapsyrýshy jaıynda málimetti, baılanys telefonyn jazyp alyp qalýy kerek. Sodan keıin polıtsııaǵa habar berýi tıis.
«Jedel-aldyn alý is-sharasynyń úsh kúni ishinde qalalyq polıtsııa basqarmasynyń qyzmetkerleri metall qabyldaý pýnktterine reıdter ótkizdi. Osyndaı oryndardyń 21-i tekserildi. Kásipkerlermen, olardyń jumysshylarymen aqparatty-túsindirý jumystary júrgizildi. Tekseris barysynda eki qylmystyq zańbuzýshylyq jáne buǵan deıin jasalǵan eki qylmys anyqtaldy, ıaǵnı Petropavldaǵy jeke turǵyn úı sektoryndaǵy turǵyndardyń aýlasynan urlanǵan shoıyn plıta, temir qubyr jáne qaqpaqtar tabyldy», - deıdi Petropavl qalalyq PB krımınaldy polıtsııa bólimi basshysynyń orynbasary Erbolat Qaptaev.
Búginde urlanǵan zattar ıelerine qaıtaryldy, istiń mán-jaıy anyqtalyp jatyr.
Úsh kúnge shaqtalǵan jedel-aldyn alý is-sharasy aıaqtalǵanymen, krımınaldy polıtsııa qyzmetkerleri men ýchaskelik polıtsııa ınspektorlary temirmen qatysty qylmystardyń aldyn alý maqsatynda metall qabyldaý oryndaryn baqylaýda ustaıdy.
